23 верасня Экспертная рада па пытаннях жыцця i сям’i пры Мінска-Магілёўскай архідыяцэзіі выказалася ў падтрымку агульнанацыянальнага збору подпісаў пад зваротам да прэзідэнта аб прыняцці адмысловай праграмы ў абарону традыцыйнай сям’і і заканадаўчай забароны прапаганды аднаполых зносінаў сярод непаўналетніх.
Зварот Экспертнай рады па пытаннях жыцця i сям’i пры Мінска-Магілёўскай архідыяцэзіі
У апошнія часы ў нашай краіне ўсё актыўней праяўляюцца тэндэнцыі непавагі да духоўных каштоўнасцяў і Богам створанага інстытуту сям’і, які з’яўляецца падмуркам грамадства. У першую чаргу яны скіраваны на дзяцей і моладзь праз СМІ, сацыяльныя сеткі, спецыяльныя семінары па гендарнай роўнасці, квір-фестывалі, падручнікі для псіхолагаў і журналістаў.
Занепакоены такім станам рэчаў, Каталіцкі Касцёл заклікае да захавання Божага права і натуральнага закону як у асабістым жыцці, так і ў жыцці грамадства.
Ён таксама звяртаецца да заканадаўцаў з заклікам распрацоўваць і прымаць законы ў адпаведнасці з вечна актуальнымі этычнымі нормамі.
На пастырскай сустрэчы святароў і кансэкраваных асобаў Мінска-Магілёўскай архідыяцэзіі, якая прайшла 19 верасня ў Мінску, арцыбіскуп Тадэвуш Кандрусевіч аб’явіў аб падтрымцы Касцёлам ініцыятывы па збору подпісаў у абарону традыцыйнай сям’і.
Першая такая акцыя прайшла ў мінулым годзе, калі за два тыдні было сабрана больш за 7000 подпісаў пад зваротам да прэзідэнта аб забароне прапаганды аднаполых зносін.
Сёлета беларускія абаронцы жыцця, у тым ліку валанцёры дабрачыннага фонду «Адкрытыя сэрцы», распачалі агульнанацыянальны збор подпісаў пад зваротам да прэзідэнта аб прыняцці адмысловай праграмы ў абарону традыцыйнай сям’і і заканадаўчай забароны прапаганды аднаполых зносін сярод непаўнагадовых.
Экспертная рада па пытаннях абароны жыцця i сям’i пры Мінска-Магілёўскай архідыяцэзіі звяртаецца з просьбай аб дапамозе ў зборы подпісаў у абарону традыцыйнай сям’і ў каталіцкіх парафіях, а таксама аб малітоўнай падтрымцы ў гэтай інтэнцыі, бо існуе небяспека прапаганды аднаполых зносін і ў нашым грамадстве.
Каталіцкі Касцёл рашуча абараняе традыцыйныя сямейныя каштоўнасці, выступае супраць садомскага граху, які з’яўляецца адным з чатырох грахоў, якія клічуць аб помсце да Неба. Трэба падкрэсліць, што Касцёл выступае менавіта супраць граху, а не супраць людзей. А за грэшнікаў, якія свядома парушаюць шостую Божую запаведзь, у тым ліку за тых, якія маюць аднаполыя зносіны, трэба маліцца і заклікаць іх да навяртання.
Па ўсіх пытаннях, звязаных са зборам подпісаў, просім звяртацца да Экспертнай рады па справах жыцця і сям’і па тэл.:
+375 (29) 260 69 09 (Вайбер).
Кс. прэлат Андрэй Стэцкевіч
старшыня Экспертнай рады па пытаннях жыцця i сям’i пры Мінска-Магілёўскай архідыяцэзіі
Мінск, 23 верасня 2019 г.
