21 верасня ў Мінскім тэалагічным каледжы імя святога Яна Хрысціцеля з удзелам арцыбіскупа Тадэвуша Кандрусевіча адбылася прэзентацыя «Новага Запавету для дзяцей і моладзі» па-беларуску — унікальнага выдання, падрыхтаванага Секцыяй па перакладзе літургічных тэкстаў і афіцыйных дакументаў Касцёла пры ККББ.
«Новы Запавет для дзяцей і моладзі» па-беларуску — гэта чарговая версія бестселера, які папулярна называецца «Біблія з папугаем», даступная ў свеце на многіх мовах.
Выданне падрыхтавана спецыяльна для юных чытачоў. Поўны пераклад Новага Запавету пададзены разам з каментарыямі, малюнкамі, тлумачэннямі, каляровымі картамі, дыдактычнымі заданнямі, цікавай інфармацыяй, якая знаёміць з тагачасным жыццём, звычаямі і людзьмі Бібліі. Усё гэта зроблена для таго, каб юны чытач свядома і з разуменнем мог плённа карыстацца Божым словам.
Гэта дасканалая прылада евангелізацыі і дыдактычны дапаможнік для святароў, катэхетаў, бацькоў і тых, хто хоча заахвоціць дзяцей і моладзь чэрпаць духоўную падтрымку і каштоўнасці са скарбніцы Хрыстовага вучэння.
«Новы Запавет для дзяцей і моладзі» (Мінск, 2019) падрыхтаваны стараннем Секцыі па перакладзе літургічных тэкстаў і афіцыйных дакументаў Касцёла Камісіі Божага Культу і Дысцыпліны Сакрамэнтаў пры Канферэнцыі Каталіцкіх Біскупаў у Беларусі і выдадзены дзякуючы выдавецтву «Pro Christo».
Адметнасцю кнігі з’яўляюцца:
- Поўны тэкст Новага Запавету ў поўным афіцыйным рыма-каталіцкім перакладзе на беларускую мову (Мінск, 2017);
- Уводзіны да кожнай кнігі і яе кароткі змест;
- Слоўнік і каляровыя карты;
- Каляровыя ўстаўкі з біблійнымі цікавосткамі і прыгодніцкімі ілюстрацыямі;
- Тлумачэнне цяжкіх паняццяў і тэмаў;
- Тэматычныя рамкі ў прывабнай форме;
- Важныя вершы, якія варта запомніць;
- Інфармацыі і малюнкі паказваюць, як выглядала жыццё ў старажытнасці.
Каардынатарам распаўсюджвання «Новага Запавету для дзяцей і моладзі» (Мінск, 2019) у дыяцэзіях Беларусі з’яўляецца Секцыя па перакладзе.
Замову на атрыманне кніг можна падаць на e-mail:
Набыць кнігу можна ў кнігарні «Духоўная кніга» (г. Мінск, вул. Багдановіча, 25).
Запрашаем у цікавую прыгоду — у вандроўку па старонках заўсёды жывой Кнігі, бо яе героямі можам быць таксама і мы! Застаецца толькі знайсці час і жаданне адправіцца ў гэтае падарожжа разам з яе натхнёнымі аўтарамі.
