Пошук


18.09.2019 13:46   Тэкст: Брат Алег Шэнда OFMCap / Фота: з архіва Беларускай Кустодыі Братоў Меншых Капуцынаў / Catholic.by

З 29 жніўня па 14 верасня адбыўся візіт вышэйшага настаяцеля кустодыі меншых братоў капуцынаў Беларусі брата Алега Шэнды OFMCap у архідыяцэзію Лібервіль (Габон, Цэнтральная Афрыка).

Cёлета архідыяцэзія святкуе юбілей 175-годдзя з’яўлення ў горадзе першых католікаў, а фактычна пачатак хрысціянізацыі цэлага рэгіёна Цэнтральнай Афрыкі. На сённяшні дзень насельніцтва Габона складаюць пераважна хрысціяне-католікі. Ёсць таксама прадстаўнікі іншых хрысціянскіх супольнасцяў і невялікая мусульманская дыяспара.

Дзякуючы запрашэнню і гасціннасці Лібервільскага арцыбіскупа Базыля Мвэ Энгонэ SDB на працягу двух тыдняў брат Алег Шэнда меў магчымасць асабіста пазнаёміцца з жыццём адносна маладога, але шматлікага і вельмі дынамічнага габонскага Касцёла. Дастаткова сціплая архітэктура гэтай афрыканскай краіны аздоблена шматлікімі каталіцкімі касцёламі і капліцамі.

Нягледзячы на моўныя абмежаванні, за два тыдні брат Алег меў магчымасць не аднойчы адчуць і пераканацца ў глыбіні веры, унутранай прыгажосці і надзвычайнай зычлівасці мясцовых вернікаў.

Чароўная прыгажосць прыроды гэтай экватарыяльнай краіны з нязвыклым для еўрапейца, крыху дакучлівым кліматам стварае ўмовы, якія абмяжоўваюць матэрыяльныя патрэбы тубыльцаў. Разлеглыя жыллёвыя кварталы габонскай сталіцы ўражваюць еўрапейскае вока сваёй простасцю і сціпласцю, але разам з тым вельмі арганічна ўпісваюцца ў мясцовую прыроду і ў дастатковай ступені забяспечваюць асноўныя патрэбы іх жыхароў.

Разнастайнасць спеваў, танцаў і адзення, якімі аздабляецца рыма-каталіцкая літургія, жаданне і ўменне надзвычай радасна святкаваць святы дзень нядзелі раскрываюць багацце рэлігійных пачуццяў мясцовых жыхароў.

Гісторыя прысутнасці капуцынаў у Габоне налічвае няпоўных дваццаць гадоў. За гэты кароткі час меншыя браты праявілі сябе ў парафіяльнай дзейнасці, разгарнулі душпастырства і клапоцяцца пра хворых, удзельнічаюць у навуковай дзейнасці мясцовага Касцёла, узяліся за арганізаванне пастаяннай апекі над нацыянальным санктуарыем Маці Божай у Габоне.

На сённяшні дзень капуцынская дэлегатура налічвае дзесяць братоў, сярод якіх з лютага 2019 года служэнне ў нацыянальным санктуарыі нясе беларус брат Валеры Кунгер OFMCap, ураджэнец Мазыра.

Асаблівасці гісторыі і культуры гэтай краіны патрабуюць дастаткова часу, каб падрыхтаваць капуцынаў мясцовага паклікання, а да гэтай пары прышчапленне францішканскай харызмы Генеральны міністр даручыў іншым акругам Ордэна.

Падчас візіту і шматлікіх сустрэч рознабакова абмяркоўваліся асаблівасці і патрэбы габонскага Касцёла, а таксама магчымыя шляхі супрацоўніцтва з тамтэйшай кустодыяй меншых братоў капуцынаў, якая, хоць і знаходзіцца далёка ад Беларусі, больш не з’яўляецца для яе чужой.

   

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

Папа Францішак

Дух хоча жыць у нас –
мы пакліканы да вечнага жыцця