З 27 па 30 жніўня ў парафіі Найсвяцейшай Тройцы ў Шылавічах (Ваўкавыскі дэканат) прайшлі рэкалекцыі аб пакліканні для моладзі з усіх парафій на Беларусі, у якіх нясуць служэнне святары з законніцкай супольнасці міхалітаў.
Такім чынам, пад Ваўкавыскам сабраліся юнакі і дзяўчаты з Васілішак, Гатава, Ізабеліна, Мінска (мікрараён Лошыца), Падароска, а таксама з саміх Шылавічаў.
Галоўная тэма рэкалекцый «Паклапаціся пра сябе» ахоплівала тры важныя аспекты: клопат пра сябе, пра сваё духоўнае жыццё і клопат пра бліжніх.
Супольная Эўхарыстыя, малітва, канферэнцыі, адарацыя дапамагалі моладзі паглыбіць духоўнае жыццё і ў цішыні сэрца пачуць голас Бога.
Супольны адпачынак і паход на возера далі магчымасць удзельнікам рэкалекцый пазнаёміцца з новымі сябрамі і такім чынам сабраць у адно і ўмацаваць маладую «міхаліцкую сям’ю», у якой на першым месцы — Бог.
Удзельнікі рэкалекцый у Шылавічах цудоўна і з карысцю правялі час, за што шчыра ўдзячныя Богу, арганізатарам і гасцінным гаспадарам — ксяндзу пробашчу Мар’яну Хамені CSMA і сястры Элігіі за адчыненыя дзверы і адкрытыя сэрцы.
