Большасць з тых, хто 5 ліпеня прыйшоў у Будслаў пешкі або прыехаў на ровары, сабраліся ўвечары на святой Імшы, цэлебрацыю якой узначаліў біскуп Казімір Велікаселец.
Усю першую палову дня ў Будславе імжэў дождж, аб якім даўно прасілі людзі ў сваіх малітвах. Такі патрэбны для сялян, дожджык крыху падмачыў пілігрымаў. Іх стракатыя ад рознакаляровых дажджавікоў шэрагі адзін за адным прыходзілі сёння ў Нацыянальны санктуарый, на парозе якога іх вітаў пробашч будслаўскай парафіі кс. Дзмітрый Дубовік.
Вядома, пілігрымка — не турпаход. Таму той, хто з малітваю ідзе ў гэты шлях да Маці Божай, не думае пра выгоды, а ўсе выпрабаванні дарогі ахвяруе Богу.
Традыцыйна падчас святой Імшы з удзелам пілігрымаў кс. Кірыл Бардонаў паасобку прывітаў удзельнікаў кожнай з 21 сёлетняй пілігрымкі з усіх дыяцэзій Каталіцкага Касцёла на Беларусі: 19-і пешых і трох велапілігрымак. Святар называў месца, адкуль ішлі пешкі або ехалі на роварах пілігрымы, агучваў пераадоленую імі адлегласць і абвяшчаў колькасць удзельнікаў і імя кіраўніка.
Пілігрымы ў адказ размахвалі сваімі сцягамі і гучна рэагавалі воклічамі і воплескамі, паказваючы, што доўгая дарога і сустрэтыя на ёй цяжкасці і перашкоды не азмрочылі для іх радасці сустрэчы з Маці Божай Будслаўскай.
Як і ў мінулыя гады, найбольш пілігрымаў прыбыло з Мінска-Магілёўскай архідыяцэзіі, Апякункаю якой з’яўляецца Маці Божая Будслаўская.
Такім чынам, традыцыя пілігрымак у Будслаў, якія таксама з’яўляюцца прызнанай ЮНЕСКА часткай нематэрыяльнай культурнай спадчыны чалавецтва, працягваецца і падтрымліваецца маладым пакаленнем беларускіх вернікаў.
