9 лютага Апостальскі Нунцый у Беларусі арцыбіскуп Габар Пінтэр наведае грэка-каталіцкі душпастырскі цэнтр св. Язэпа ў Мінску (вул. Арджанікідзэ, 6), дзе ўзначаліць Боскую Літургію ў гонар святых Кірыла і Мятода — апосталаў славянаў і апекуноў Еўропы.
Як паведамляе svjazep.org, ва ўрачыстасці прымуць удзел арцыбіскуп Тадэвуш Кандрусевіч, Мітрапаліт Мінска-Магілёўскі, і дапаможныя біскупы Мінска-Магілёўскай архідыяцэзіі Юрый Касабуцкі і Аляксандр Яшэўскі SDB.
У гэтым годзе ў парафіях Беларускай Грэка-Каталіцкай Царквы праходзяць адмысловыя Дні малітвы і ўшанавання святых Кірыла і Мятода з нагоды 1150-й гадавіны спачыну ў Рыме (14 лютага 869 г.) св. Кірыла.
У 2018 годзе споўнілася 1150 гадоў з моманту, калі папа Адрыян ІІ благаславіў пераклады біблійных і літургічных тэкстаў на славянскую мову (названую стара-царкоўна-славянскай).
Пачатак у 11.00.
