Сем’і ў гэты ўік-энд могуць паехаць на рэкалекцыі ажно ў чатыры гарады, у Гудагаі пройдуць Дні цішыні для дзяўчат, а ў Гродне завершыцца «Тыдзень талентаў», які праводзіць моладзь OPEN.
1. Паехаць на сужэнскія рэкалекцыі
Калі: пятніца-нядзеля
Дзе: г. Браслаў, вул. Гагарына, 41А
г. Баранавічы, вул. Шаўчэнкі, 6
Праграма сужэнскіх рэкалекцый дазваляе паглыбіць давер і ўзаемаразуменне ў жыцці мужа і жонкі, а таксама дае парады для выхаду са шматлікіх канфліктных сітуацый у сям’і.
Да ўдзелу запрашаюцца ўсе сем’і, незалежна ад канфесійнай прыналежнасці (католікі, праваслаўныя, непрактыкуючыя хрысціяне і г.д.); тыя, хто жыве ў шлюбе, і тыя, хто толькі распісаны ў ЗАГСе.
Падрабязнасці ТУТ>>
2. Паслухаць пра зачацце і паніжаную плоднасць на рэкалекцыях для сямейных пар
Калі: пятніца-нядзеля
Дзе: г. Орша, вул. Савецкая, 6 (парафія св. Юзафа)
Рэкалекцыі будуць складацца з духоўнай і тэрапеўтычнай часткі. Духоўныя практыкаванні для сужэнцаў правядзе кс. Аляксандр Жарнасек MIC, а тэрапеўтычную частку — доктар Людміла Баракава.
Людміла Баракава — аўтар «міла-тэрапіі», якая дапамагла вялікай колькасці сужэнцаў, якія сутыкнуліся з праблемамі з зачаццем і выношваннем цяжарнасці.
Падрабязнасці ТУТ>>
3. Прыняць удзел у сустрэчы сем’яў Віцебскай дыяцэзіі
Калі: субота, нядзеля
Дзе: парафiя св. Антонiя Падуанскага ў Паставах
Сустрэча сем’яў Віцебскай дыяцэзіі пройдзе па ініцыятыве дабрачыннага фонду ў абарону жыцця і сям’і «Адкрытыя сэрцы». Дэвіз сустрэчы — «Няхай мне станецца паводле Твайго слова».
Падрабязнасці ТУТ>>
4. Навучыцца малітве ў цішыні разам з сёстрамі кармэліткамі
Калі: пятніца-нядзеля
Дзе: г. Брэст, вул. Дворнікава, 53/1
Узрост: 25+
Рэкалекцыі «У цішыні і маўчанні са св. Янам ад Крыжа» ў кляштары сясцёр кармэлітак Дзіцяткі Езуса пройдуць у поўным маўчанні.
Падрабязнасці ТУТ>>
5. Наведаць Дні малітвы для дзяўчат у Гудагаі
Калі: пятніца-нядзеля
Дзе: кляштар сясцёр кармэлітанак Дзіцяткі Езуса ў Гудагаі
Удзельнікі: толькі дзяўчаты
Сёстры кармэліткі Дзіцяткі Езуса праводзяць Дні малітвы на тэму «Як распазнаваць і з адвагай выконваць Божую волю ў сваім жыцці». Удзельнікі павінны мець з сабою Біблію.
Падрабязнасці па тэлефоне: +375 29 525 53 30 (с. Магдаліна), +375 33 390 36 89 (с. Алетэа)
6. Схадзіць на канцэрт дзяцей і моладзі душпастырства OPEN
Калі: субота-нядзеля
Дзе: г. Гродна, вул. Маладзёжная, 2 (рэктаральны касцёл Звеставання Найсвяцейшай Панне Марыі (пабрыгіцкі))
У гэтыя выхадныя ў Гродне завершыцца акцыя «Тыдзень талентаў» моладзевага душпастырства OPEN разам з душпастырствам сем’яў OPEN Families.
На працягу тыдня пасля вечаровай св. Імшы моладзь ладзіла для гасцей адмысловы вечар, дзелячыся сваімі талентамі. Тут быў і кулінарны конкурс, і майстар-клас па рукадзеллі, і паэтычны вечар...
Заключным этапам акцыі стане вечар дзіцячай і моладзевай творчасці «Дзяліцеся сваім талентам», а таксама канцэрт-справаздача з малітвай падзякі.
Падрабязнасці ТУТ>>
7. Прыехаць у Дабраўляны на Імшу з нагоды 25-годдзя асвячэння капліцы
Калі: нядзеля, 13.00
Дзе: в. Дабраўляны (Смаргонскі раён)
Дабраўляны — маёнтак, вядомы з XVI ст., належаў прадстаўнікам розных шляхецкіх родаў Вялікага Княства Літоўскага.
Імшу будзе цэлебраваць біскуп Юрый Касабуцкі.
Традыцыйна жыхары гэтай мясцовасці былога Свянцянскага павету належалі да парафіі ў Свіры. Сённяшняя капліца св. Апосталаў Пятра і Андрэя ў Дабраўлянах, асвячаная ў 1993 годзе будучым кардыналам Казімірам Свёнткам, аднаўлялася намаганнямі мясцовых вернікаў разам з тагачасным свірскім пробашчам кс. Войцехам Леманскім.
Падрабязнасці ТУТ>>
8. Стаць госцем вечарыны ў Чырвоным касцёле да гадавіны асвячэння
Калі: нядзеля, 13.00
Дзе: бібліятэка імя Адама Міцкевіча, Чырвоны касцёл у Мінску
Касцёл св. Сымона і св. Алены, які сёння лічыцца адным з сімвалаў Мінска, быў асвячаны 21 лістапада 1910 года. З нагоды гадавіны асвячэння ў касцёле пройдзе адмысловая вечарына.
Падрабязнасці ТУТ>>
