28–29 ліпеня ў Навагрудку адзначаць 75-гадовы юбілей мучаніцкай смерці благаслаўлёных с. Марыі Стэлы і яе дзесяці паплечніц, расстраляных нацыстамі ў Батароўскім лесе каля Навагрудка 1 жніўня 1943 г. У межах урачыстасці фарны касцёл Перамянення Пана ў Навагрудку, дзе знаходзяцца рэліквіі благаслаўлёных сясцёр-мучаніц, будзе абвешчаны санктуарыем.
Сёстры ахвяравалі сваё жыццё за 120 чалавек, арыштаваных і асуджаных на расстрэл. Смяротнае пакаранне было заменена для арыштаваных на працы ў Германіі. Зняволеных вывезлі 24 ліпеня, а некаторых вызвалілі. Усе яны перажылі вайну.
Сёстры-мучаніцы з Навагрудка былі беатыфікаваныя папам Янам Паўлам ІІ 5 сакавіка 2000 г. на плошчы св. Пятра ў Рыме.
Праграма ўрачыстасцяў
28 ліпеня
- 17.30 — прывітанне пілігрымаў; малітва на месцы расстрэлу сясцёр
- 18.00 — св. Імша ў лесе на месцы мучаніцтва, якую ўзначаліць арцыбіскуп Тадэвуш Войда, Мітрапаліт Беластоцкі (Польшча), з удзелам арцыбіскупа Тадэвуша Кандрусевіча, Мітрапаліта Мінска-Магілёўскага
- 22.00 — пачатак чування ў навагрудскім фарным касцёле Перамянення Пана
- канферэнцыя
- выстаўленне Найсвяцейшага Сакрамэнту да 4.30
- 23.00 — адарацыя, якую правядуць сёстры назарэтанкі
29 ліпеня
- 24.00 — адарацыя, якую правядзе моладзь
- 1.00 — адарацыя, якую правядуць вернікі з Ліды
- 2.00 — Крыжовы шлях
- 3.00 — адарацыя, якую правядуць пілігрымы
- 4.30 — святая Імша, якую ўзначаліць біскуп Пінскі Антоні Дзям’янка
- 9.30 — кароткая праграма пра благаслаўлёных сясцёр мучаніц
- 10.00 — святая Імша ў фарным касцёле Перамянення Пана, якую ўзначаліць Апостальскі Нунцый у Беларусі арцыбіскуп Габар Пінтэр
- на заканчэнне Імшы будзе прачытаны дэкрэт, якім фарны касцёл Перамянення Пана ў Навагрудку абвяшчаецца санктуарыем благаслаўлёных сясцёр-мучаніц Марыі Стэлы і паплечніц.
З гісторыі святыні
Фарны, або парафіяльны касцёл у Навагрудку быў пабудаваны князем Вітаўтам у гатычным стылі ў канцы XIV стагоддзя. Свой сучасны выгляд святыня набыла пасля перабудовы на пачатку XVIII ст.
У фарным касцёле ў Навагрудку 12 лютага 1799 г. быў ахрышчаны беларускі польскамоўны паэт Адам Міцкевіч. Менавіта ў гэтай святыні перад абразом Маці Божай ён у дзяцінстве па малітве матулі быў аздароўлены ад цяжкай хваробы, пра што ўзгадвае на самым пачатку паэмы «Пан Тадэвуш».
