24 чэрвеня ў вішнеўскай парафіі св. Юды Тадэвуша (Смаргонскі дэканат) з удзелам Гродзенскага біскупа Аляксандра Кашкевіча будзе прэзентавана кніга, прысвечаная гісторыі гэтай часткі старажытнага Віленскага краю.
У выданні, якое выйшла ў свет у сталічным выдавецтве «Энцыклапедыкс», пад адной вокладкай змешчаны дзве кнігі: мемуары Фелікса Жылкі «Мае ўспаміны», у якіх аўтар узгадвае пра жыццё ў былой Жодзішкаўскай гміне ў першай палове ХХ ст., а таксама мастацка-дакументальная аповесць Анатоля Шчучкі «Святыняў маўклівыя цені». Выданне, прысвечанае тром 100-гадовым юбілеям: заканчэння Першай сусветнай вайны, абвяшчэння Беларускай Народнай Рэспублікі і аднаўлення польскай дзяржаўнасці, у якім выкарыстаны рэдкія архіўныя фотаздымкі, разлічана на ўсіх, хто цікавіцца гісторыяй сваёй зямлі.
Пачатак прэзентацыі — а 11-й гадзіне.
Пасля прэзентацыі — св. Імша ва ўрачыстасць Нараджэння св. Яна Хрысціцеля, якая ў вішнеўскай парафіі традыцыйна з’яўляецца адпустам. Цэлебрацыю Эўхарыстыі ўзначаліць Гродзенскі біскуп Аляксандр Кашкевіч.
