Урачыстая эўхарыстычная працэсія, якая распачнецца святой Імшой у нясвіжскім касцёле Божага Цела ў суботу 2 чэрвеня а 11-й гадзіне, будзе прымеркавана да 425-й гадавіны пабудовы святыні — першага помніка барока ва Усходняй Еўропе.
Касцёл Божага Цела ў беларускім Нясвіжы на працягу ўсёй сваёй багатай гісторыі ніколі не зачыняўся, застаючыся месцам культу і рэальнай прысутнасці на нашай зямлі жывога Хрыста ў Эўхарыстыі. Святыня з радавой крыптай-пахавальняй княскага роду Радзівілаў, якая ўваходзіць у спіс сусветнай спадчыны UNESCO, з’яўляецца не толькі архітэктурна-гістарычнай каштоўнасцю, якая вабіць турыстаў з усяго свету, а перадусім домам Божым, дзе Пану спадабалася жыць сярод свайго вернага народа.
Плануецца, што ва ўрачыстасці, якую ўзначаліць Мітрапаліт Мінска-Магілёўскі арцыбіскуп Тадэвуш Кандрусевіч, возьмуць удзел нашчадкі роду Радзівілаў і прадстаўнікі дзяржаўных уладаў.
Пробашч нясвіжскай парафіі Божага Цела кс. канонік Пётр Шарко запрашае далучыцца да святкавання ўсіх тых, хто прымаў сакрамэнты ў святыні, а таксама тых, хто нейкім чынам духоўна з ёю звязаны.
