![](/3/images/news/2018/03/2018-03-28-w.jpg)
Усе жадаючыя запрашаюцца на адкрыццё першай персанальнай выстаўкі графікі Ягора Арлова «Цыклон», якое адбудзецца ў мінскім касцёле Найсвяцейшай Тройцы (св. Роха) на Залатой Горцы 8 красавіка. Пачатак у 12.00.
Выстаўка будзе працаваць да 25 мая.
Куратар выстаўкі — мастак Надзея Бука. На экспазіцыі прадстаўлены працы за 2017-2018 гг., выкананыя любімымі матэрыяламі аўтара — каляровымі алоўкамі.
Назву выстаўкі мастак абраў не выпадкова: асноўны сюжэт яго графічных карцін — неба. Аўтар выяўляе яго ва ўсёй палітры — ці гэта амаль чорная бура, ружовы захад сонца або гульня канстрастаў у перадсвітальны час.
Аўтар тонка заўважае нюансы і ва ўласцівай яму манеры адлюстроўвае ўбачанае на паперы па памяці. Ягор любіць назіраць за аблокамі, у іх ён бачыць не фігуры, а багатую фактуру і характар.
Працы Ягора напоўнены паветрам, на іх бачна тое, што часта мы проста не заўважаем — магчыма, таму што часцей глядзім сабе пад ногі, а не на неба.
Пра аўтара:
Ягор Арлоў нарадзіўся 12 лістапада 1998 г.
Парафіянін касцёла Найсвяцейшай Тройцы (св. Роха) на Залатой Горцы. У сценах гэтай святыні ён прыняў Першую Камунію, а зараз ходзіць на заняткі па рэлігіі і ў студыю малявання пры касцёле. Вучыцца на першым курсе аддзялення фатаграфіі каледжа лёгкай прамысловасці і бытавога абслугоўвання насельніцтва.