2 снежня ў нарачанскай парафіі Св. Андрэя, апостала, пройдзе дэканальная моладзевая сустрэча «Андрэйкі». Падчас імпрэзы будзе праведзены конкурс ведаў «Сучасныя місіянеры — героі евангелізацыі», прысвечаны хрысціянскім місіям і місіянерам.
Правядзенне конкурсаў ведаў падчас моладзевых сустрэч у Нарачы стала ўжо добрай традыцыяй. Касцёл і Другі Ватыканскі Сабор, 100-годдзе з дня нараджэння кардынала Казіміра Свёнтка, 500-годдзе з дня нараджэння св. Тэрэзы Авільскай, пашырэнне культу Божай міласэрнасці ў свеце, 100-годдзе фацімскіх аб’яўленняў — вось тыя тэмы, якім былі прысвечаны мінулагоднія конкурсы ведаў у нарачанскай парафіі.
Сёлета конкурс вырашана прысвяціць тэме хрысціянскіх місій і місіянерам, бо, па словах папы Францішка, «сучасныя місіянеры — героі евангелізацыі».
Падчас падрыхтоўкі да конкурсу моладзь даведаецца не толькі пра тое, хто такія місіянеры, але і пазнаёміцца з дзейнасцю Кангрэгацыі Дачок Беззаганнай Марыі, якая адзначыла сваё 125-годдзе і сёстры якой нясуць сваё служэнне ў Свіры.
Пачатак сустрэчы ў 17.00.
Для тых, хто збіраецца на «Андрэйкі», створана адмысловая віктарына, якую можна прайсці па спасылцы.
Сустрэча пройдзе па адрасе:
Вёска Нарач (Мядзельскі раён), вул. Завадская, 2а.
