9 жніўня ў санктуарыі Маці Божай Барунскай, Суцяшальніцы Засмучаных у Барунах (Гродзенская дыяцэзія, Ашмянскі дэканат) распачалася дзевяцітыднёвая Навэнна, падчас якой вернікі будуць дзякаваць за каранацыю, якая адбылася ў мінулым годзе, і выпрошываць патрэбныя духоўныя дары.
Навэнну распачалі вернікі з Ашмянскага дэканату, якія разам з ксяндзом дэканам Паўлам Раманоўскім у вялікай колькасці прыбылі ў санктуарый.
У суботу, 16 жніўня, прыбыць да Маці Божай Барунскай і памаліцца каля Яе цудадзейнага абраза запрашаюцца людзі старэйшага ўзросту, самотныя і хворыя асобы, каб яны маглі ў спакоі духа вытрываць усе цяжкасці і спазнаць Божую міласэрнасць.
Кульмінацыяй Навэнны станецца Урачыстасць Маці Божай Суцяшальніцы Засмучаных у Барунах, якая адбудзецца 11 кастрычніка ў 12.00.
Кусташ санктуарыя ксёндз Павел Паўлюкевіч і вернікі парафіі святых апосталаў Пятра і Паўла ў Барунах запрашаюць усіх святароў і вернікаў Гродзенскай дыяцэзіі і ўсяго Касцёла на Беларусі да ўдзелу ў Навэнне і урачыстасці. Кожную суботу ў 12.00 будзе цэлебравацца адмысловая святая Імша. Усе ахвотныя могуць наведаць барунскі касцёл — юбілейную святыню — і стаць «пілігрымамі надзеі», аддаючы свае цярпенні і смутак свайго сэрца Богу праз заступніцтва Марыі і, поўнасцю давераючы Яму сваё жыццё, атрымаць адпуст.
Парафіяне з Барунаў жадаюць, каб жыццё пад плашчом Марыі напоўніла сэрцы Яе шанавальнікаў нязгаснай надзеяй, Божымі дарамі, шчасцем і супакоем.
