11 і 12 кастрычніка ў санктуарыі Гродзенскай дыяцэзіі ў Барунах (Ашмянскі дэканат) пройдуць урачыстасці з нагоды каранацыі цудадзейнага абраза Маці Божай Барунскай, Суцяшальніцы засмучаных.
Цэлебрацыю галоўнай святой Імшы, падчас якой адбудзецца абрад каранацыі абраза, узначаліць Старшыня Канферэнцыі Каталіцкіх Біскупаў у Беларусі Мітрапаліт Мінска-Магілёўскі арцыбіскуп Юзаф Станеўскі.
Ускладанне карон здзейсніць біскуп эмэрыт Аляксандр Кашкевіч, які год таму прыняў рашэнне каранаваць славутую ласкамі Барунскую ікону Багародзіцы.
Каранацыйныя ўрачыстасці распачнуцца ў санктуарыі Гродзенскай дыяцэзіі ў Барунах вігіліяй увечары напярэдадні.
Праграма ўрачыстасцяў
- 11 кастрычніка, пятніца
- 20.00 – адарацыя перад абразом
- 21.00 – Марыйны заклік і працэсія са свечкамі
- 22.00 – святая Імша
- 12 кастрычніка, субота
- 9.00 – святая Імша
- 10.00 – Акафіст у выкананні хору Грэка-Каталіцкай Царквы
- 11.00 – Ружанец
- 12.00 – святая Імша з ускладаннем біскупскіх карон на абраз Маці Божай Барунскай, Суцяшальніцы засмучаных
Біскуп Гродзенскі Уладзімір Гуляй запрашае духавенства, законных сясцёр і ўсіх свецкіх вернікаў дыяцэзіі да ўдзелу ў гэтай падзеі, гістарычнай для Касцёла на Гродзеншчыне, і да супольнай малітвы.
