У пятніцу 7 чэрвеня, ва ўрачыстасць Найсвяцейшага Сэрца Езуса, ва ўсіх касцёлах Мінска-Магілёўскай архідыяцэзіі адбудзецца прысвячэнне парафій Найсвяцейшаму Сэрцу Езуса.
Па ініцыятыве Мітрапаліта Мінска-Магілёўскага арцыбіскупа Юзафа Станеўскага, 6 ліпеня ў Нацыянальным санктуарыі Маці Божай Будслаўскай на заканчэнне Года падзякі будзе здзейснена прысвячэнне Мінска-Магілёўскай Мітраполіі і ўсіх вернікаў Касцёла ў Беларусі Найсвяцейшаму Сэрцу Езуса.
Па распараджэнні арцыбіскупа Станеўскага, у межах духоўнай падрыхтоўкі да гэтай падзеі на працягу года ў парафіях адбываліся набажэнствы з мэтаю аднавіць пабожнасць вернікаў да Найсвяцейшага Сэрца Езуса і Беззаганнага Сэрца Марыі, дзякуючы ім за атрыманыя ласкі і перапрашаючы за ўчыненыя грахі. Кожны месяц, пачынаючы са жніўня мінулага года, у адну з першых субот паасобныя дэканаты архідыяцэзіі ладзілі ў санктуарыі Маці Божай Будслаўскай малітоўныя сустрэчы, прысвечаныя разважанню над адной з Божых Запаведзяў. 1 чэрвеня ў межах падрыхтоўкі ў Будславе прайшоў Дзень дзіцяці, падчас якога адбылося прысвячэнне дзяцей Беларусі Найсвяцейшаму Сэрцу Езуса.
У пятніцу адмысловыя набажэнствы прысвячэння Найсвяцейшаму Сэрцу Езуса пройдуць у парафіях Мінска-Магілёўскай архідыяцэзіі.
- Тэкст набажэнства для спампоўвання ТУТ>>>
Тэкст набажэнства падрыхтаваны выдавецтвам «Pro Christo» і зацверджаны кампетэнтнай касцёльнай уладай.
