25 лістапада ў Нарачы (Мінска-Магілёўская архідыяцэзія, Мядзельскі дэканат) адбудзецца афіцыйная прэзентацыя ў Беларусі Апостальскай адгартацыі Папы Францішка пад назвай на французскай мове C’est la сonfianсe — «Гэта давер» — з нагоды 150-годдзя з дня нараджэння святой Тэрэзы ад Дзіцяткі Езуса і Найсвяцейшага Аблічча.
«Гэта давер і нічога, акрамя даверу, мае весці нас да Любові». Менавіта гэтыя словы, якія былі напісаны ў верасні 1896 года святой Тэрэзай ад Дзіцяткі Езуса і Найсвяцейшага Аблічча, натхнілі назву Апостальскай адгартацыі, якую Папа Францішак прысвяціў святой Тэрэзе з Лізьё, доктару Паўсюднага Касцёла і Апякунцы каталіцкай місіі.
25 лістапада ў парафіяльным касцёле святога Андрэя, апостала, у Нарачы, дзе нясуць служэнне кармэліты босыя, пасля святой Імшы а 12-й гадзіне Генеральны настаяцель Ордэна кармэлітаў босых айцец Мігель Кале OCD у межах свайго візіту ў Беларусь здзейсніць афіцыйную прэзентацыю ў нашай краіне згаданай Апостальскай адгартацыі.
Набыць адгартацыю можна ў выдавецтве Мінска-Магілёўскай архідыяцэзіі «Pro Christo», а таксама пры парафіяльных супольнасцях, дзе нясуць служэнне кармэліты босыя. Пераклад дакумента на беларускую мову здзейснены Секцыяй па перакладзе літургічных тэкстаў і афіцыйных дакументаў Касцёла пры Канферэнцыі Каталіцкіх Біскупаў у Беларусі.
