8 верасня ў парафіі Нараджэння Найсвяцейшай Панны Марыі ў Заслаўі (Мінска-Магілёўская архідыяцэзія, дэканат Мінск-Захад) адзначаць парафіяльную адпустовую ўрачыстасць.
З гэтай нагоды па запрашэнні новага пробашча заслаўскай парафіі ксяндза каноніка Антонія Клімантовіча цэлебрацыю адпустовай святой Імшы ў тутэйшай святыні ўзначаліць арцыбіскуп эмэрыт Тадэвуш Кандрусевіч.
Заслужаны іерарх таксама здзейсніць абрад благаслаўлення ўсталяванага ў заслаўскім касцёле аргана, прывезенага са Швецыі.
Інструмент быў збудаваны заснаванай у 1892 года шведскай арганабудаўнічай фірмай у горадзе Лідчэпінгу, якая з 1912 года вядомая пад назвай Nordfors & Co Orgelbyggeri. З 1952 па 1971 год уладальнікам кампаніі быў арганны майстар Орвар Смедман (1914–2008). Менавіта ў гэты перыяд і быў пабудаваны арган, усталяваны ў заслаўскім касцёле.
Ксёндз Антоній распавёў Catholic.by неверагодную гісторыю інструмента.
Невядома, якім чынам арган трапіў у Беларусь, але патомны беларускі арганны майстар Генадзь Чарняўскі знайшоў яго ў Мінску ў вельмі дрэнным стане і вырашыў аднавіць. Для гэтага майстар перавёз арган у свой гараж і распачаў карпатлівую працу.
Перш за ўсё яму давялося заняцца рамонтам труб, што вырабляюцца з мяккага металічнага сплаву, якія былі пашкоджаны. Генадзь Чарняўскі давёў сваю працу да паспяховага завяршэння, і ўпершыню арган загучаў у ягоным гаражы, дзе давялося нават разабраць столь, каб ён там змясціўся.
Цяпер арган гучыць у заслаўскім касцёле.
Гэта адносна невялікі інструмент: у яго адзін мануал (клавіятура для рук) і педаль (клавіятура для ног), але ён здольны напаўняць касцёльную прастору сваім гучаннем ад ціхага да ўзнёслага. У аргана пяць рэгістраў, розныя камбінацыі з якіх прыдатныя для суправаджэння адпаведных частак святой Імшы, а таксама для выканання сольнай і ансамблевай музыкі.
Заслаўскія вернікі на чале са сваім новым душпастырам шчыра запрашаюць усіх ахвотных узяць удзел у супольнай малітве падчас парафіяльнай урачыстасці.
Праграма
- 12.00 — адпустовая святая Імша
- 13.00 – 1800 — адарацыя Найсвяцейшага Сакрамэнту
- 18.15 — сустрэча арцыбіскупа Тадэвуша Кандрусевіча і благаслаўленне аргана
- 18.30 — урачыстая святая Імша, цэлебрацыю якой узначаліць арцыбіскуп Тадэвуш Кандрусевіч
