9 жніўня ў касцёле Найсвяцейшай Тройцы (Святога Роха) на Залатой Горцы ў Мінску адбудзецца вечарына арганнай музыкі.
У выкананні тытулярнай арганісткі Залатагорскай парафіі Ганны Горбач прагучаць рэлігійныя і духоўныя творы нямецкіх і французскіх кампазітараў.
Пачатак у 20.00.
Пра выканаўцу
Ганна Горбач — піяністка, арганістка, выкладчыца. Выпускніца Беларускай дзяржаўнай акадэміі музыкі (2019) па спецыяльнасці фартэпіяна (клас загадчыка кафедры спецыяльнага фартэпіяна дацэнта Уладзіміра Дулава) і аргана (клас дацэнта Уладзіміра Неўдаха).
З 2020 па 2022 год выкладала на кафедры спецыяльнага фартэпіяна і на кафедры музычнай педагогікі БДзАМ. У цяперашні час выкладае на кафедры спецыяльнага фартэпіяна ва Уральскай дзяржаўнай кансерваторыі імя М. Мусаргскага (Расія, г. Екацерынбург).
Вядзе актыўную канцэртную дзейнасць як арганістка. Удзельнічала ў фестывалях «Калядныя вечары на Залатой Горцы», «Залатагорская ліра» (Мінск), Міжнародным арганным фестывалі памяці кардынала Казіміра Свёнтка (Пінск), «Gloria Dei» (Мядзведзічы), «Ars Magna Organi» (Беларусь).
Выступае ў ансамблях розных складаў, у прыватнасці, у арганным дуэце разам з Лізаветай Марозавай. У складзе дуэта стала лаўрэатам Першай прэміі VII Міжнароднага конкурсу арганных дуэтаў «Organo Duo» імя Федэрмэсэра (Расія).
