6 мая ў Нацыянальным санктуарыі ў Будславе збяруцца прадстаўнікі розных касцёльных рухаў з усёй Беларусi, і адной з частак гэтай сустрэчы стане iнтэрактыўная праграма для дзяцей.
Праграму пад назвай «Сэрца Марыi» супольна рыхтуюць удзельнікі руху «Сужэнскiя сустрэчы» i руху сужэнскай духоўнасці Equipes Notre-Dame.
- Арганiзатары дзiцячай праграмы просяць да 1 мая ўключна зарэгістраваць удзельнікаў (дзяцей ва ўзросце ад 4 да 14 гадоў) у анлайн-форме, змешчанай на галоўнай старонцы сайта руху Equipes Notre-Dame ТУТ>>>
Гэта неабходна для падрыхтоўкі раздатачных матэрыялаў і лепшай арганізацыі квэсту.
Iнтэрактыўная гульня пройдзе на тэрыторыi каля будслаўскай святынi, а калi будзе дождж — у памяшканні будслаўскага Дома культуры. Пажадана, каб усе дзецi мелi з сабою дажджавiкi.
Усiх удзельнiкаў пры рэгiстрацыi на квэст чакае незвычайны салодкi пачастунак «Вясёлкавая каша». Арганiзатары таксама звяртаюць увагу на тое, што ў Будславе не будзе арганiзаванага абеду для пiлiгрымау, i просяць узяць пасiлак з сабою.
Плануецца, што завяршэннем квэсту стане акт прысвячэнне сем’яў Беззаганнаму Сэрцу Марыi перад цудадзейным абразом Маці Божай Будслаўскай.
Дзецi разам з анiматарамi будуць вяртацца ў святыню для благаслаўлення Найсвяцейшым Сакрамэнтам, таму арганiзатары просяць бацькоў загадзя распавесцi дзецям пра важнасць захоўваць цiшыню перад Езусам у Эўхарыстыі.
Для камфортнага ўдзелу ў сустрэчы сем’яў з маленькiмi дзецьмi ў Доме пілігрыма будзе арганiзаваны пакой «Мацi i дзiця».
Нагадваем, што малiтоўная сустрэча ў Нацыянальным санктуарыі ў Будславе, якая пройдзе 6 мая, у першую суботу месяца, стане чарговай сустрэчай ў межах Вялікай навэнны падрыхтоўкі да 25-гадовага юбілею каранацыі цудадзейнага абраза Маці Божай Будслаўскай. Разам з пiлiгрымамi пpерад цудадзейным абразом будзе маліцца Генеральны вікарый Мінска-Магілёўскай архідыяцэзіі біскуп Юрый Касабуцкі.
