20 мая ў сталічным мікрараёне Новая Баравая адбудзецца пасвячэнне новапабудаванага касцёла святога Францішка, а таксама алтара святыні.
Святая Імша, падчас якой адбудуцца абрады пасвячэння касцёла і алтара, распачнецца а 11-й гадзіне.
Узначаліць цэлебрацыю Апостальскі нунцый у Рэспубліцы Беларусь арцыбіскуп Антэ Ёзіч.
Узвядзенне святыні ў парафіі святога Францішка ў Новай Баравой — сталічным мікрараёне, што ўзнік у ваколіцах даўняй вёскі Копішча, дзе нясуць служэнне меншыя браты капуцыны, распачалося ў 2014 годзе, калі быў закладзены першы вуглавы камень святыні. 4 кастрычніка 2020 года над новазбудаваным касцёлам узняліся крыжы, якія благаславіў біскуп Юрый Касабуцкі, а пад Новы, 2023 год, у святыні быў усталяваны новы арган.
Урачыстасць пасвячэння касцёла і алтара будзе суправаджацца святочнай праграмай на працягу цэлага дня. Напачатку адбудзецца канцэрт дзіцячых калектываў, пазней — гала-канцэрт з удзелам парафіяльнага хора Transitus, арганіста Юрыя Габруся, а таксама музычнага народнага ансамбля «Росквіт» і Дзяржаўнага камернага хора Рэспублікі Беларусь.
Завершыцца святочны дзень канцэртам для моладзі з удзелам маладых талентаў, гурта праслаўлення Verbum Dei і гурта традыцыйнай беларускай музыкі PAWA.
Вернікі парафіі святога Францішка і іх душпастыры, меншыя браты капуцыны, шчыра запрашаюць усіх ахвотных на ўрачыстасць пасвячэння касцёла і алтара.
Адрас: Мінскі раён, в. Копішча, вул. Авіяцыйная, 4.
Праграма
- 11.00 – святая Імша з абрадамі пасвячэння касцёла і алтара
- 13.00 – абед для ўсіх ўдзельнікаў
- 14.00 – канцэрт дзіцячых калектываў
- 17.00 – гала-канцэрт
- 19.00 – канцэрт для моладзі
