25–27 лістапада у Доме Святой Тройцы ў Баранавічах адбудуцца рэкалекцыі для сужонкаў і духоўных асоб ад руху «Сужэнскія Сустрэчы».
Арганізатары запрашаюць СУЖОНКАЎ:
- рознага ўзросту; як з сямейным стажам, так і маладых;
- католікаў, праваслаўных, пратэстантаў і не практыкуючых веры;
- тых, якія маюць касцёльны шлюб і тых, хто толькі распісаліся ў ЗАГСе;
- тых, якія перажываюць крызіс у адносiнах, і так званыя «моцныя сужэнствы»;
- тых, якія жадаюць радавацца сужэнскаму жыццю, працаваць над сваімі сужэнскімі адносінамі, перажыць аднаўленне ўзаемных пачуццяў, паглыбіць сваё каханне ці нават адкрыць яго нанава.
Праграма рэкалекцый таксама прадугледжана для ДУХАВЕНСТВА І КАНСЭКРАВАНЫХ АСОБ, якія хочуць развіваць свой дыялог і свае адносіны з Богам і іншымі людзьмі.
Практычныя веды, набытыя падчас рэкалекцый, удзельнікі змогуць самастойна выкарыстоўваць у сваёй штодзённасці, каб будаваць не толькі адносіны паміж сабою, але і з дзецьмі, роднымі, калегамі па працы, іншымі людзьмі і, канечне, з Богам.
Арганізацыйная інфармацыя
- Арганізатары гарантуюць захаванне ўсіх мер засцярогі ад каранавірусу (маскі, адлегласць, сродкі дэзінфекцыі).
- Пачатак рэкалекцый у пятніцу 25 лістапада ў 19.00.
- Заканчэнне рэкалекцый у нядзелю 27 лістапада каля 14.00.
- Кожная пара атрымае асобны пакой.
- У рэкалекцыях абавязковы ўдзел абодвух сужонкаў, без дзяцей і ва ўсёй праграме.
Адрас: Дом Святой Тройцы, г. Баранавічы, вул. Шаўчэнкі, 6
Запіс па тэлефонах:
Сайт руху: suvstrechi.by
Сведчанні ўдзельнікаў рэкалекцый:
Мы размаўлялі адно з адным пра складаныя праблемы, на якія ў нас не было часу, пра якія мы не ўмелі казаць, і менавіта дакрананне да гэтых тэм нас аб’яднала. Гэта былі глыбокія разважанні, якія датычацца нашага сумеснага жыцця. Гэтым разважанням спрыяла атмасфера далікатнасці, інтымнасці.
Святло ў канцы тунэля… Нацешыліся магчымасцю пабыць удвох. Так атрымалася, што ў нас не было нічога «мядовага», а тут мы гэта перажылі! І яшчэ мы адкрылі, што ў праваслаўных і католікаў шмат агульнага і мы — адно цэлае.
Вельмі парадавала атмасфера бяспекі (ніхто не пасягаў на маю асабістую прастору). Лепш пазнаў сябе, больш раскрылася жонка. Адчуваю прыліў энергіі і жаданне быць больш адкрытым на блізкіх. Увогуле, атрымаў больш, чым чакаў. Мы ад’язджаем з пачуццём, што нашыя адносіны сталі мацней.
Уік-энд стаў для нас «шокавай тэрапіяй»: за гэтыя 3 дні перажылі нанава 21 год сумеснага жыцця, разбурылі сцяну непаразумення і вырашылі паспрабаваць быць разам. Пра развод ужо не думаем!
Мы вельмі радыя, што пачынаем сваё сужэнскае жыццё з такіх рэкалекцый і верым, што яны дапамогуць нам вырашаць праблемы, якія стаяць перад намі.
