Увечары 16 ліпеня ў межах урачыстасцяў у гонар Маці Божай Шкаплернай у санктуарыі Гродзенскай дыяцэзіі ў Гудагаі адбудзецца набажэнства Крыжовага шляху па самай працяглай Кальварыі ў Беларусі.
Гэтае пакутнае набажэнства, што на Гудагайскім фэсце традыцыйна адбываецца суботнім вечарам, сёлета пройдзе ўжо ў трынаццаты раз.
Лічыцца, што Крыжовы шлях на Кальварыі ў Гудагаі — самы цяжкі. Ён расцягнуўся на тры з паловаю кіламетры па полі і ўзлесках, а дарогу часта перагароджваюць вялікія валуны і карэнне дрэваў змяшанага бору. Тым не менш у набажэнстве заўсёды бярэ ўдзел вялікая колькасць вернікаў, у тым ліку пажылыя людзі і дзеці.
Падчас Крыжовага шляху святары служаць удзельнікам сакрамэнтам паяднання, і многія выкарыстоўваюць гэтую магчымасць, каб паспавядацца і пакутаваць за свае грахі.
- Пачатак набажэнства ў 20.30.
- Выхад ад касцёла.
Сёлетнія ўрачыстасці ў Гудагаі адбываюцца ў 15-ю гадавіну каранацыі цудадзейнага абраза Маці Божай Шкаплернай папскімі каронамі, якую 15 ліпеня 2007 года здзейсніў кардынал Казімір Свёнтэк.
