У панядзелак 6 чэрвеня, ва ўспамін Найсвяцейшай Панны Марыі, Маці Касцёла, Апостальскі нунцый у Беларусі арцыбіскуп Антэ Ёзіч узначаліць цэлебрацыю святой Імшы ў касцёле святога Сымона і святой Алены ў Мінску, падчас якой будзе маліцца за мір ва ўсім свеце.
Прадстаўнік Папы Францішка ў нашай краіне наведае Чырвоны касцёл па запрашэнні пробашча парафіі ксяндза каноніка Уладзіслава Завальнюка ў першую гадавіну благаслаўлення копій цудадзейных абразоў Маці Божай з Марыйных санктуарыяў Беларусі. Нунцый будзе маліцца аб міры перад гэтымі іконамі, якія за мінулы год пасля здзейсненага ім благаслаўлення перэгрынавалі ўздоўж межаў Беларусі і наведалі шмат парафій у розных кутках краіны.
Пачатак святой Імшы ў 19.00.
На YouTube канале парафіі святога Сымона і святой Алены ў Мінску, а таксама ў эфіры «Радыё Марыя» будзе весціся прамая трансляцыя цэлебрацыі.
Пасля Імшы ў святыні прагучаць Марыйныя і іншыя рэлігійныя спевы ў выкананні парафіяльнага хору «Голас Душы».
Ушанаваць Маці Божую ў Яе цудадзейных абразах сталічныя вернікі і ўсе ахвотныя могуць штодня ў Чырвоным касцёле (вул. Савецкая, 15) да 9 чэрвеня з 7-і гадзін раніцы да 21-й гадзіны ўвечары.
