У адказ на запрашэнне Папы Францішка далучыцца да чыну прысвячэння Расіі і Украіны Беззаганнаму Сэрцу Марыі, які Святы Айцец здзейсніць 25 сакавіка, у мінскім катэдральным касцёле Найсвяцейшага Імя Марыі адбудзецца адпаведнае набажэнства з удзелам арцыбіскупа Станеўскага.
Ва ўрачыстасць Звеставання Пана а 17-й гадзіне па цэнтральнаеўрапейскім часе (а 19-й па мінскім) падчас пакаяннага набажэнства ў базыліцы святога Пятра Папа Францішак прысвеціць увесь свет, а асабліва Украіну і Расію, Беззаганнаму Сэрцу Марыі.
Набажэнства пройдзе ў еднасці з мясцовымі Касцёламі на ўсіх кантынентах, у тым ліку ў Беларусі.
З адпаведным Зваротам выступілі каталіцкія біскупы нашай краіны.
Пробашч мінскай архікатэдральнай парафіі ксёндз канонік Антоній Клімантовіч ад імя вернікаў супольнасці сардэчна запрашае ўсіх ахвотных далучыцца ў гэты дзень да супольнай адарацыі Найсвяцейшага Сакрамэнту і малітоўнага чування, а таксама пакутнага набажэнства Крыжовага шляху ў інтэнцыі міру ў свеце і аб навяртанні Расіі, Украіны і Беларусі.
Праграма набажэнства
- 13.00 — пачатак Адарацыі
- 17.45 — пакутнае набажэнства (Крыжовы шлях)
- 18.30 — святая Імша; цэлебрацыю ўзначаліць Мітрапаліт Мінска-Магілёўскі арцыбіскуп Юзаф Станеўскі
- 19.00 — адмысловае набажэнства з чынам прысвячэння Расіі і Украіны Беззаганнаму Сэрцу Марыі
На партале Catholic.by будзе весціся прамая трансляцыя набажэнства з мінскай архікатэдры.
