Айцы дамінікане, якія нясуць служэнне ў парафіі святога Казіміра і святой Ядвігі ў Магілёве, запрашаюць усіх ахвотных падчас Вялікага посту прайсці курс інтэнсіўнай фармацыі на тэму: «У што мы верым?»
Падставай гэтага велікапоснага фармацыйнага курсу стане Youcat — змястоўная і даступная апрацоўка Катэхізісу Каталіцкага Касцёла для моладзі на беларускай мове. Знаёмства з ім будзе карысным таксама і для дарослых.
Папа Бэнэдыкт XVI, ініцыятар з’яўлення гэтага выдання, заахвочваў моладзь:
«Прашу вас, вывучайце катэхізіс з палкасцю і настойлівасцю! Ахвяруйце на гэта свой час!» Падчас Сусветных дзён моладзі, якія праходзілі ў Мадрыдзе ў 2011 годзе, ён раздаў кніжкі Youcat удзельнікам.
Велікапосны фармацыйны курс мае дзве мэты.
- Па-першае, паглыбіць веды і разуменне каталіцкай веры па наступных пунктах:
- вера;
- сакрамэнты;
- жыццё ў Хрысце;
- малітва.
- Па-другое, працаваць над сумленнем і карыстацца набытымі ведамі такім чынам, каб яны сталі падставаю для размовы з Богам у форме просьбы, перапрашэння, падзякі і праслаўлення.
Увесь змест Youcat падзелены на 44 дні — ад Папяльцовай серады (2 сакавіка) да Вялікага чацвярга (14 красавіка) — такім чынам, што ў кожны з гэтых дзён прапануецца разбіраць 12 пунктаў, разважаць над імі і маліцца.
Катэхізіс для моладзі Youcat можна набыць у касцёльных кіёсках.
Арганізатары курсу заахвочваюць мець уласную кніжку, каб чытаць асабіста, у сям’і або ў супольнасці і дзяліцца з іншымі тым, што кранае, а таксама абмяркоўваць тое, што цяжка зразумець ці ўспрыняць.
Курс будзе праходзіць дыстанцыйна. З гэтай мэтай у мэсэнджары Viber ствараецца група юкат2022, дзе можна будзе знайсці вялікую частку штодзённых матэрыялаў.
Магілёўскія дамінікане і вернікі парафіі святога Казіміра і святой Ядвігі запрашаюць усіх ахвотных падчас Вялікага посту далучыцца да іх у гэтым аскетычна-фармацыйным курсе, на што спатрэбіцца прысвяціць крыху часу за кошт меншага карыстання інтэрнэтам, а таксама намаганні і сістэматычнасць. Удзельнікі будуць маліцца адзін за аднаго, каб гэты час прынёс у жыцці кожнага адпаведны плён. Арганізатары прапануюць у якасці штодзённай малітвы за супольнасць удзельнікаў курсу малітву анёла з Фацімы:
О Божа мой, веру ў Цябе, праслаўляю Цябе, давяраю Табе і люблю Цябе. Прашу ў Цябе прабачэння для тых, хто не верыць у Цябе, не праслаўляе Цябе, не давярае Табе і не любіць Цябе. Амэн.
Падрабязная інфармацыя па тэл.:
+375 (29) 291 92 11 — айцец Раман Шульц ОР
е-mail:
