9 снежня ў мінскім архікатэдральным касцёле Найсвяцейшага Імя Марыі пройдзе калядная сустрэча духавенства і кансэкраваных асоб, якія нясуць служэнне ў Мінска-Магілёўскай архідыяцэзіі.
Падчас першай сустрэчы духавенства з удзелам новага арцыбіскупа Мітрапаліта Мінска-Магілёўскага Юзафа Станеўскага удзельнікі падзеляцца паміж сабой традыцыйнай аплаткай і абмяняюцца святочнымі віншаваннямі.
Апошняя аплаткавая сустрэча духавенства і кансэкраваных асоб архідыяцэзіі адбылася два гады таму. Тады яе ўдзельнікі дзякавалі за служэнне ў Беларусі Апостальскаму нунцыю Габару Пінтэру, які завяршаў сваю місію ў нашай краіне. У мінулым годзе калядныя сустрэчы не праводзіліся ў сувязі з эпідэміяй COVID-19.
Сёлетняя калядная сустрэча пройдзе ў архікатэдральным касцёле Найсвяцейшага Імя Марыі ў Мінску.
Яна стане не толькі першай сустрэчай духавенства архідыяцэзіі з новым арцыбіскупам, але таксама першай пастырскай сустрэчай пасля працяглага перапынку, звязанага з санітарнымі абмежаваннямі.
Паколькі да гэтага часу эпідэмічная сітуацыя застаецца няпростай, сустрэча пройдзе з захаваннем неабходных мер бяспекі.
Пачатак сустрэчы ў 11.00.
Да ўдзелу запрашаюцца ўсе святары і кансэкраваныя асобы, які нясуць служэнне ў Мінскім і Магілёўскім рэгіёнах Мінска-Магілёўсккай архідыяцэзіі.
