З нядзелі 9 жніўня ў парафіі Унебаўзяцця Найсвяцейшай Панны Марыі ў Будславе праходзяць парафіяльныя святыя місіі, якія для мясцовых вернікаў праводзяць святары з законніцкай супольнасці рэдэмптарыстаў.
Штодзённа ў святыні перад цудадзейным абразом Маці Божай Будслаўскай у 17.30 адбываецца малітва святога Ружанца і а 18-й гадзіне цэлебруецца святая Імша за Беларусь.
Да малітвы можна духоўна далучыцца з дапамогай прамой трансляцыі з Нацыянальнага санктуарыя.
Урачыстасць Унебаўзяцця Найсвяцейшай Панны Марыі, якая адзначаецца 15 жніўня, з’яўляецца ў Будславе асаблівым днём. У гонар Унебаўзяцця была асвячана вялікая будслаўская базыліка; гэты тытул носіць таксама тутэйшая парафія. Згодна з адмысловым папскім прывілеем, нададзеным 28 студзеня 1791 года, у гэтую ўрачыстасць у Будславе можна атрымаць адпуст.
Цэлебрацыя адпустовай урачыстай святой Імшы, удзельнікі якой асаблівым чынам будуць маліцца за нашу Бацькаўшчыну, распачнецца 15 жніўня ў 12.00.
За паўгадзіны да Імшы — ружанцовая малітва з трансляцыяй анлайн.
У нядзелю 16 жніўня адбудзецца заканчэнне парафіяльных місій. У 9.30 распачнецца святы Ружанец, а ў 10.00 — святая Імша.
Увага! У сувязі з заканчэннем місій, гэта будзе адзіная нядзельная Эўхарыстыя ў Будславе.
