18–19 ліпеня ў Гудагаі адбудзецца штогадовая парафіяльная адпустовая ўрачыстасць у гонар Маці Божай Шкаплернай.
Урачыстасць пройдзе пад дэвізам «Увесь Твой» — словы святога Яна Паўла ІІ, вялікага шанавальніка Маці Божай. Фэст стане нагодай падзякаваць Богу за Ягоныя дары, а таксама прасіць аб патрэбных ласках. Сярод шматлікіх інтэнцый сёлетняга фэсту — малітва праслаўлення за 30 гадоў з часу аднаўлення служэння кармэлітаў босых у Гудагаі.
Праграма ўрачыстасці
18 ліпеня
- 18.00 – святая Імша на заканчэнне навэнны
- 20.30 – Крыжовы шлях на Кальварыі
19 ліпеня
- 00.00 – працэсія святла і святая Імша
- 10.00 – святая Імша на польскай мове
- 12.00 – адпустовая святая Імша
На партале Catholic.by адбудзецца прамая трансляцыя ўрачыстасці.
Арганізацыйныя заўвагі
Славуты ласкамі абраз Маці Божай Гудагайскай будзе, як і ў мінулыя гады, выстаўлены для асабістай малітвы вернікаў.
У сувязі са складанай эпідэміялагічнай сітуацыяй усе набажэнствы будуць праходзіць на адкрытым паветры з захаваннем санітарных мер перасцярогі.
Удзельнікаў просяць памятаць аб неабходнасці захоўваць сацыяльную дыстанцыю і рэкамендуюць выкарыстоўваць маскі.
Касцёл будзе адчынены для індывідуальнай малітвы. Для захавання сацыяльнай дыстанцыі на падлозе будзе нанесена адмысловая разметка, а пры ўваходзе ў святыню будуць усталяваны дазатары з антысептыкам.
Па прычыне пандэміі мясцовыя жыхары не маюць магчымасці прымаць людзей на начлег. Тыя, хто пілігрымуе ў Гудагай у індывідуальным парадку, змогуць паставіць палаткі на тэрыторыі каля плябаніі.
Вернікаў, якія хочуць падчас урачыстасці прыняць святую Камунію, просяць загадзя прыступіць да споведзі ў сваіх парафіях.
Усіх жадаючых просяць загадзя падрыхтаваць інтэнцыі на святыя Імшы, а таксама малітоўныя падзякі і просьбы, якія можна будзе пакінуць у касцёле або ў палатцы на прыкасцёльнай плошчы.
Усіх, хто не будзе прысутнічаць на ўрачыстасцях у Гудагаі, заахвочваюць далучыцца духоўна да святкавання і малітвы ва ўсіх інтэнцыях, якія носім у сэрцы, у тым ліку аб спыненні пандэміі каранавірусу.
