16 ліпеня ў дыяцэзіяльным санктуарыі ў Гудагаі (Гродзенская дыяцэзія, Астравецкі дэканат) адзначылі ўрачыстасць Найсвяцейшай Панны Марыі з гары Кармэль (Шкаплернай).
Галоўную святую Імшу ўзначаліў кусташ санктуарыя айцец Аркадзь Куляха OCD, а гамілію прамовіў ксёндз Іван Кароткін, пробашч парафіі святога Арханёла Міхала ў Лужках (Віцебская дыяцэзія, Мёрскі дэканат).
У сваім слове святар засяродзіўся на марыйнай духоўнасці, падкрэсліўшы:
«Чым бліжэй чалавек да Марыі, тым бліжэй ён да Хрыста».
Таксама прапаведнік звярнуў увагу на сутнасць малітвы праслаўлення, падчас якой чалавек пераносіць увагу з самога сябе, сваіх патрэбаў і праблем на Бога, пачынае бачыць Яго веліч, дабрыню і любоў і таму велічае Яго так, як Марыя.
У літургіі ўдзельнічалі мясцовыя кармэліты босыя, адказны за душпастырства моладзі Мінска-Магілёўскай архідыяцэзіі ксёндз Андрэй Бурак з маладымі валанцёрамі з Мінска, а таксама кансэкраваныя асобы і пілігрымы з іншых парафій.
Пасля святой Імшы адбылося набажэнства, падчас якога прысутныя даверылі сябе Богу праз заступніцтва Найсвяцейшай Панны Марыі, Каралевы Шкаплера.
Затым парафіяне, моладзь і госці павіншавалі свайго пробашча, айца Аркадзя Куляху, з 60-годдзем з дня нараджэння. Вернікі выказалі падзяку за душпастырскае служэнне і пажадалі яму моцнага здароўя і Божага благаслаўлення.
Фэст у гонар Маці Божай Гудагайскай пройдзе 18 і 19 ліпеня. Айцы кармэліты запрашаюць усіх парафіян і гасцей прыняць у ім удзел.
