У нядзелю 5 ліпеня а 13-й гадзіне на партале Catholic.by распачнецца прамая трансляцыя ўрачыстай святой Імшы з нагоды 30-й гадавіны вяртання касцёла святога Мікалая, біскупа, у Свіры (Мядзельскі дэканат).
У адроджанай свірскімі вернікамі святыні цэлебрацыю святой Імшы прыміцыі ўзначаліць ксёндз новапрэзбітэр Павел Сідарэнка, які падчас навучання ў Міждыяцэзіяльнай вышэйшай духоўнай смемінарыі імя святога Тамаша Аквінскага ў Пінску праходзіў у тутэйшай парафіі летнюю душпастырскую практыку.
На заканчэнне цэлебрацыі новапрэзбітэр удзеліць усім прысутным у святыні вернікам і тым, хто духоўна далучыцца да іх з дапамогаю відэатрансляцыі, прыміцыйнае благаслаўленне (без традыцыйнага ўскладання рук).
Свірская парафія, якая знаходзіцца на землях гістарычнага Віленскага краю, існуе з 1452 г. Мураваны касцёл у мястэчку быў узведзены ў 1654 г. На пачатку ХХ ст. у сувязі з узрослай колькасцю вернікаў святыня была значна разбудавана: новы касцёл памерамі ў некалькі разоў пераўзыходзіў стары, які ператварыўся ў трансепт — папярочную наву павялічанай святыні.
Працы былі канчаткова завершаны ў 1909 г., а асвячэнне касцёла пасля яго кардынальнай перабудовы адбылося 18 чэрвеня 1928 г. Яго здзейсніў тагачасны Віленскі арцыбіскуп Рамуальд Ялбжыкоўскі.
У 1960 г. касцёл быў зачынены і ператвораны ў вытворчае памяшканне завода аптычнага прыборабудавання. У 1990 г. намаганнямі мясцовых вернікаў вернуты парафіі.
Пробашч парафіі св. Мікалая, біскупа, у Свіры кс. канонік Багуслаў Маджэеўскі ад парафіянаў запрашае ўзяць удзел ва ўрачыстасці або далучыцца да яе з дапамогаю анлайн-трансляцыі.
Да 30-й гадавіны вяртання святыні у свірскім касцёле можна будзе ўбачыць фотавыставу ўнікальных здымкаў абраза Маці Божай Будслаўскай, якую прадставіць дырэктар парталу Catholic.by кс. Аляксандр Улас.
Здымкі былі зроблены ім у сакавіку мінулага года падчас замены шкла на цудадзейнай іконе, што дало магчымасць сфатаграфаваць яе ў найлепшай якасці. Фота дазваляюць убачыць усе дэталі вялікай святыні нашага народа і выдатнага твора сакральнага мастацтва эпохі Адраджэння.
Так добра разгледзець абраз Маці Божай Будслаўскай немагчыма нават знаходзячыся непасрэдна перад алтаром у Нацыянальным санктуарыі.
Паколькі сёлета далёка не ўсе маглі наведаць урачыстасці ў Будславе, гэтая выстава — цудоўная магчымасць убачыць цудадзейную ікону, паглядзець у вочы Маці Божай Будслаўскай, зблізку звярнуцца да Яе з сардэчнай просьбай, а таксама набыць якасна надрукаваную выяву абраза.
