26 лютага ў касцёле Найсвяцейшай Тройцы (св. Роха) на Залатой Горцы фатографы Віктар Ведзень і Дзмітрый Кульпановіч прадставяць у аўтарскім фармаце выставу мастацкіх вобразаў на тэму Крыжовага шляху.
Аснову праекта склалі фотаздымкі інсцэніраванага набажэнства Крыжовага шляху (2016 г.), што традыцыйна адбываецца ў Вялікі тыдзень у парафіі Найсвяцейшай Тройцы (святога Роха) на Залатой Горцы ў Мінску.
«Дзякуючы сумеснай працы з Дзмітрыем атрымалася знайсці свой мастацкі стыль фатаграфіі для гэтага незвычайнага набажэнства. Хацелася не проста паказаць вобразы, але і перадаць настрой і характар удзельнікаў», — распавёў Catholic.by Віктар Ведзень.
Аўтары заахвочваюць падзяліцца сваімі ўражаннямі ад экспазіцыі, а таксама перажываннямі Крыжовага шляху, у кнізе водгукаў.
Выстава адкрыецца ў Папяльцовую сераду ў касцёле Найсвяцейшай Тройцы (св. Роха) на Залатой Горцы (г. Мінск, пр-т Незалежнасці, 44-А) пасля святой Імшы ў 18.30 з традыцыйным абрадам пасыпання галоваў попелам на пачатак Вялікага посту.
Выставу ў залатагорскай святыні можна наведаць на працягу Вялікага посту і Велікодных святаў штодзённа да 14 красавіка з 8.00 да 20.00.
Даведка па тэл.: +375 (29) 395 64 34
