![](/3/images/news/2019/12/10838/2018-12-22-agon-002.jpg)
19 снежня распачнецца традыцыйна святочная «вандроўка» Бэтлеемскага агню па гарадах і мястэчках Беларусі. У гэты дзень агонь, запалены ад нязгаснай лампады ў базыліцы Нараджэння Пана ў Бэтлееме, будзе дастаўлены на беларуска-польскую мяжу.
З 19 па 22 снежня скаўты запаляць гэтым агнём лампады ў касцёлах розных гарадоў і мястэчак Беларусі.
Штогод акцыя перадачы Бэтлеемскага агню яднае шматлікіх людзей у розных краінах Еўропы і Паўночнай Амерыкі.
Полымя, якое сімвалізуе нараджэнне Збаўцы, а таксама супакой, надзею і еднасць, запальваецца ў базыліцы Нараджэння Пана ў Бэтлееме, затым дастаўляецца ў Вену (Аўстрыя) і перадаецца праз скаўцкую эстафету ў розныя краіны Еўропы і Паўночнай Амерыкі.
Першая акцыя распаўсюджвання Бэтлеемскага агню праводзілася ў 1986 годзе. Тады прадстаўнікі Аўстрыйскай тэлерадыёкампаніі ўпершыню даставілі запаленую ў Бэтлееме лампаду, каб падтрымаць хворых і самотных людзей напярэдадні свята Божага Нараджэння. Гэтую ініцыятыву падтрымалі аўстрыйскія скаўты. Ужо праз год перадсвяточная акцыя стала міжнароднай.
![](/3/images/news/2019/12/10838/2018-12-22-agon-007.jpg)
На афіцыйным узроўні акцыю перадачы Бэтлеемскага агню падтрымліваюць як кіраўнікі хрысціянскіх Цэркваў Еўропы, так і прадстаўнікі дзяржаўных уладаў розных краін.
У 1998 годзе полымя Бэтлеемскага агню было перададзена ў 22 краіны Еўропы, сярод якіх была і Беларусь.
Гэтая падзея адыблася дзякуючы сябрам польскага згуртавання скаўтаў ZHP. У 2008 годзе да акцыі ўпершыню далучыліся скаўты з каталіцкіх парафіяльных супольнасцяў Беларусі.
«Распаўсюджванне агню з Бэтлеема ўжо стала нашай традыцыяй. Штогод мы прыносім, прывозім Святло Слова, якое сталася Целам, у розныя парафіі нашай Бацькаўшчыны. І мы вельмі цешымся, што праз гэта можам служыць Богу і бліжнім. Няхай Езус народзіцца ў нашых сэрцах! Вясёлых святаў!» — кажа генеральны камісар каталіцкіх скаўтак у Беларусі Юлія Чарніцкая.
19 снежня прадстаўнікі польскага згуртавання скаўтаў ZHP урачыста перададуць агонь з Бэтлеема ў катэдральны касцёл святога Францішка Ксавэрыя ў Гродне. У гэты ж дзень у гродзенскай катэдры эстафету перадачы агню распачнуць скаўты з каталіцкіх супольнасцяў.
21 снежня каталіцкія скаўты і скаўткі даставяць агонь у архікатэдральны касцёл Найсвяцейшага Імя Марыі ў Мінску.
Распаўсюджванне Бэтлеемскага агню будзе працягвацца да 22 снежня.
Спіс парафій будзе будзе дададзены.