Перад малітвай «Анёл Панскі» ў Ватыкане 4 верасня, на заканчэнне ўрачыстай Эўхарыстыі, падчас якой была кананізавана Маці Тэрэза з Калькуты, Святы Айцец заклікаў вернікаў маліцца за каталіцкіх місіянераў, якія загінулі або падвергліся насіллю падчас свайго служэння ў розных частках свету.

«У гэты момант хачу ўзгадаць усіх, хто загінуў, служачы братам у складаных і небяспечных кантэкстах. Асаблівым чынам я думаю пра шматлікіх манахінь, якія дораць сваё жыццё, не пакідаючы для сябе нічога», — сказаў Папа Францішак.

У прыватнасці Пантыфік узгадаў пра 51-гадовую іспанскую місіянерку сястру Ісабэль Солу Матас, забітую 2 верасня ў Гаіці. Святы Айцец пажадаў, каб у гэтай краіне, «якая падвергнулася шматлікім выпрабаванням», «спыніліся акты насілля і яна стала больш бяспечнай для ўсіх». «Узгадаем таксама пра іншых манахінь, якія нядаўна сталі ахвярамі насілля ў розных краінах», — дадаў Папа.

На працягу 2015 г. у свеце былі забіты 22 прадстаўнікі Касцёла: 13 святароў, чатыры манахіні і пяць свецкіх вернікаў. Акты насілля адносна духавенства і душпастырскіх работнікаў працягваюцца і ў бягучым годзе.

Паводле беларускай рэдакцыі Ватыканскага радыё

(AG)