У гэтым годзе 24 снежня падчас вігілійнай святой Імшы фігурку Немаўлятка Езуса да стаенкі на плошчы Святога Пятра прынясуць і пакладуць у яселькі ватыканскія паліцэйскі і пажарны.

Такое рашэнне Губернатарства Ватыкана было прынята з нагоды 200-годдзя заснавання ватыканскага корпуса жандармерыі і паклікана стаць «невялікім жэстам удзячнасці людзям, якія шчодра аддалі сябе служэнню бліжнім у бядзе, працуючы без стомы».

У паведамленні Губернатарства нагадваецца, што ватыканскія пажарныя і жандармы супрацоўнічалі з італьянскай паліцыяй, Грамадзянскай абаронай і шматлікімі валанцёрамі падчас выратавальнай акцыі, што мела месца пасля землятрусу ў Цэнтральнай Італіі. Яны самаахвярна «ратавалі людзей з-пад руінаў, разбіралі абвалы, патрулявалі населеныя пункты, прадухіляючы магчымае марадзёрства».

Паводле sib-catholic.ru
(VGr)