“Простым жэстам” з вялікім значэннем назваў Святы Айцец ініцыятыву, якая праводзілася 6 красавіка на плошчы св. Пятра. Кожны з тысяч вернікаў, якія прыйшлі туды, меў магчымасць атрымаць “кішэннае” Евангелле. Натхняльнікам ініцыятывы стаў сам Папа Францішак.

Раней Пантыфік некалькі разоў заахвочваў вернікаў пастаянна насіць з сабой невялікае Евангелле, каб штодзённа чытаць фрагмент з яго. Святы Айцец прызнаўся, што ўзгадаў старажытную традыцыю Касцёла - падчас Вялікага посту ўручаць Евангелле катэхумэнам, якія рыхтаваліся прыняць хрост. “Вазьміце яго, вазьміце з сабой, і чытайце яго кожны дзень. Гэта Езус гаворыць з вамі ў ім!” - сказаў Папа сабраным на ватыканскай плошчы.

Святы Айцец адзначыў, што невялікія Евангеллі распаўсюджваліся бясплатна. “Дарам атрымалі, дарам давайце, нясіце пасланне Евангелля!” - заклікаў Пантыфік, а калі хтосьці ўсё ж пажадае нечым “аплаціць” атрыманую кнігу, прапанаваў зрабіць гэта малітвай за ворагаў, справай міласэрнасці або прабачэннем непрыяцеля.

Хоць вернікі атрымалі Евангелле ў “традыцыйным” фармаце, як кнігу, Папа не супраць, каб Божае слова чытаць з дапамогай высокатэхналагічных прылад. “Вы можаце насіць з сабой Біблію ў мабільным тэлефоне або планшэце”, - адзначыў Пантыфік і дадаў, што “важна чытаць Божае слова з дапамогай любых сродкаў”, галоўнае - заўсёды чытаць яго і слухаць, што кажа Езус.

Паводле беларускай рэдакцыі Ватыканскага радыё

(AG)