«Не справа Касцёла падтрымліваць таго ці іншага палітыка, — сказаў венесуэльскі кардынал Балтасар Энрыке Порас Кардоса, арцыбіскуп Мерыды. — Мы з людзьмі, і яны хочуць перамен». Пра гэта 31 студзеня паведаміла беларуская рэдакцыя партала Vatican News.
Венесуэльскія біскупы неаднойчы падкрэслівалі, што і яны, і святары блізкія да людзей, каб тыя не адчувалі сябе пакінутымі.
Іерархі заклікалі паліцыю і войска не выкарыстоўваць насілле ў дачыненні да мірных дэманстрантаў.
Гэта, на думку пастыраў Касцёла, адзіны спосаб якім народ можа выказаць сваю незадаволенасць і быць пачутым, каб выйсці з глыбокага крызісу.
У сваю чаргу арцыбіскуп Кора Мар’яно Хасэ Пара Сандавал адзначыў, што людзі стаміліся ад драматычнай сітуацыі, у якой знаходзяцца ўжо вельмі доўга. Ён заклікаў усіх палітыкаў, каб пачалі думаць пра краіну і знайшлі рашэнне, як спыніць пакуты народа.
