Вядомы польскі футбаліст Роберт Левандоўскі, які выступае за нямецкі клуб Баварыя, падзяліўся з чытачамі Спартыўных фактаў пра свой удзел у дабрачыннасці.
«Я рады, што маю талент ад Бога. Але талент — гэта не ўсё, куды важней — тваё сэрца», — адзначыў спартсмен.
Ужо некалькі гадоў разам з жонкай ён дапамагае маленькім пацыентам у Цэнтры здароўя дзіцяці. Упершыню футбаліст наведаў гэты цэнтр дзевяць гадоў таму.
«Пасля той сустрэчы я яшчэ доўга асэнсоўваў пабачанае, — прыгадвае Левандоўскі. — Гэта былі нявінныя маленькія дзеці, з цярпеннем на твары, пасля аперацый. Я не ўмею гэта апісваць... Гэта гучыць банальна, але такія візіты нагадваюць, што ў жыцці ёсць рэчы важныя і самыя важныя».
«Я магу гуляць у футбол, зарабляць грошы і хачу дапамагаць. Хачу таксама развівацца як чалавек, — тлумачыць Левандоўскі. — Цяжка глядзець на цярпенне іншых, але таксама цяжка асэнсоўваць, што ўсім дапамагчы ты не здолееш. Мы не можам аздаравіць увесь свет».
Футбаліст падтрымлівае дзяцей з Цэнтра не толькі фінансава, але і маральна.
«Неяк я сустрэў там хлопца, які быў прыхільнікам футболу і бачыў ува мне свайго куміра. Ён моцна хварэў, ужо пагадзіўшыся з тым, што памірае. У яго не было ахвоты змагацца», — прыгадвае Роберт Левандоўскі.
«Мы доўга размаўлялі. Вынікі даследаванняў вельмі палепшыліся. Ён сам не ўсведамляў, што мае ў сабе сілу», — адзначыў Левандоўскі.
На пытанне, ці варта казаць пра актыўны ўдзел у дабрачыннасці, спартсмен адказаў з упэўненасцю: «Чым больш ты чуеш пра якія-небудзь пазітыўныя ініцыятывы, тым часцей маеш ахвоту сам у іх паўдзельнічаць».
Паводле слоў футбаліста, пасля таго, як СМІ напісалі пра яго дапамогу Цэнтру здароўя дзіцяці, адгукнулася шмат людзей, якія таксама хацелі як-небудзь дапамагчы. «Пра гэта варта расказваць», — перакананы Левандоўскі.
