Рэліквіі св. Тэрэзы ад Дзіцятка Езус з Лізьё і яе бацькоў, святых Луі Мартэна і Зэлі Герэн, наведаюць Скандынавію. Яны ўпершыню апыняцца за Палярным кругам.
Пачынаючы з 28 верасня рэліквіі будуць знаходзіцца ў Швецыі, з 6 кастрычніка – у Нарвегіі, з 19 кастрычніка – у Даніі, з 24 кастрычніка – у Фінляндыі, а з 3 лістапада – у Ісландыі, дзе ў гэты час будзе святкавацца 50-годдзе дыяцэзіі Рэйк’явік.
У 2013 годзе рэліквіі св. Тэрэзы ад Дзіцятка Езус пілігрымавалі па Беларусі.
У Лізьё рэліквіі вернуцца 12 лістапада. Мэта пілігрымкі рэліквій сям'і Мартэнаў – падтрымка сем'яў у скандынаўскіх краінах, а таксама, як напісалі мясцовыя біскупы ў пастырскім лісце пра гэту падзею, – узмацненне веры католікаў.
Цэнтральным пунктам пілігрымкі стане святая Імша 6 лістапада ў шведскім горадзе Вадсцена, якую ўзначаліць старшыня епіскапату Скандынавіі – біскуп з Капенгагена Чэслаў Козан.
Сакратар Канферэнцыі Каталіцкіх Біскупаў у Скандынавіі с. Ганна Мірыям Кашнер звярнула ўвагу, што святая Тэрэза з Лізьё – апякунка місій, а «нашы краіны – гэта місійная тэрыторыя». Акрамя таго, ва ўсіх скандынаўскіх краінах ёсць кармэліцкія кляштары, а Тэрэза ад Дзіцятка Езус была кармэліткай з 16 гадоў жыцця ажно да смерці ў 24 гады.
«Я ведаю, што ў іншых краінах, якія ўжо наведалі гэтыя рэліквіі, было нямала навяртанняў католікаў», – заўважыла манахіня.
