«Калі шчыра, ты яго не шакуеш», — кажа плакат, на якім каталіцкі святар з вялікімі вачыма слухае споведзь у канфесіянале.
Падобныя і іншыя білборды стварыў «Інстытут Рут» — каталіцкая прасямейная і пралайф-арганізацыя. Яна размясціла білборды на вуліцах амерыканскіх гарадоў і заклікае рабіць гэта ў сацсетках.
З іншага білборда святы Тамаш Аквінскі кажа нам: «Грэх робіць цябе дурнем».
«Кампанія „Ідзі да споведзі“ — гэта спосаб нагадаць людзям, што Бог поўны літасці і мы можам у любы час прыйсці да Яго з нашымі грахамі і знайсці прабачэнне. Ці ёсць лепшы для гэтага час, чым пост?» — кажа доктар Джэніфер Робак Морз, заснавальніца і кіраўнік арганізацыі.
«Сем’і разбураюцца не самі па сабе. Не самі па сабе распадаюцца шлюбы. Гэта вынік таго, што хтосьці грашыць. Найлепшы паратунак для шлюбу — гэта пакаянне», — дадае Джэніфер Морз.
