Пяць кантынентаў ахоплівае дабрачынная дзейнасць епіскапату Італіі ў межах праекту дапамогі краінам трэцяга свету. Большую частку сродкаў — 15 млн еўра — перададуць у Афрыку, дзе за гэтыя грошы будзе рэалізавана каля 130 праектаў.
Адным з найважнейшых праектаў стане паляпшэнне ўмоў жыцця сем’яў, якія жывуць у раёне возера Мункамба ў Дэмакратычнай Рэспубліцы Конга. Дапамога будзе прызначана перадусім для жанчын, якія арганізоўваюцца ў невялікія групы, каб мець магчымасць прадаваць тканіну, пальмавы алей або мыла.
Фінансавую падтрымку атрымаюць таксама дзяўчаты з пачатковых школ, якія замест таго, каб хадзіць на ўрокі, вымушаныя даглядаць малодшых братоў і сясцёр.
З гэтай мэтай епіскапат Італіі прадугледзіць стварэнне ясляў. У планах таксама цэнтр здароўя з акушэрскім аддзяленнем.
Акрамя Афрыкі дапамогу італьянскіх біскупаў атрымаюць таксама Азія, Лацінская Амерыка, Усходняя Еўропа і Блізкі Усход.
