Касцёл — не палітычная партыя і не ўваходзіць у кааліцыі з іншымі грамадскімі інстытутамі. Пра гэта заявіў старшыня італьянскага епіскапату кардынал Гуалцьеро Басэцці, выказваючыся пра выбары ў парламент краіны.
Ён звярнуў увагу на недахоп даверу ў грамадстве да палітыкі, а таксама пра нежаданне людзей адказна ўдзельнічаць у выбарах. Паводле слоў іерарха, біскупы бачаць у выбарах магчымасць адбудовы ў грамадстве надзеі на адраджэнне краіны і вяртанне грамадскага супакою.
У Італіі, як заўважыў кардынал, пануе настрой «грамадскай крыўды», якая падпітваецца за кошт эканамічнай нестабільнасці.
Старшыня епіскапату падкрэсліў, што «варта адрэагаваць на культуру страху, які ў некаторых выпадках можа быць зразумелы, але не павінен ніколі перараджацца ў ксенафобію».
Іерарх такім чынам выказаўся адносна нядаўняга выступу кандыдата ў кіраўнікі рэгіёну Ламбардзіі, які абяцаў выбаршчыкам, што будзе бараніць «белую расу» ад небяспекі мігрантаў, што выклікала ўсеагульнае абурэнне.
Кардынал раскрытыкаваў таксама перадвыбарчыя абяцанні, а іх фармуліроўку назваў амаральнай. Цытуючы папу Францішка, іерарх заклікаў да дыялогу, звярнуўшы ўвагу, што ў перамовах гаворка не заўжды ідзе пра дыялог.
«Перамовы служаць для таго, каб адкроіць сабе частку агульнага торта, а дыялог азначае пошук супольнага дабра для ўсіх», — сказаў кардынал Басэцці.
