18 студзеня распачнецца трохдзённы візіт Святога Айца ў Перу. З гэтай нагоды зняволеныя з усяго Перу змайстравалі амаль 300 тысяч ружанцаў. Сродкі ад іх продажу, як паведамляе ватыканскае інфармацыйнае агенцтва Fides, часткова пакрыюць выдаткі архідыяцэзіі Лімы на візіт Папы.
У працы было задзейнічана 650 зняволеных мужчынскіх і жаночых турмаў. Памятныя ружанцы складаюцца з пацерак, драўлянага крыжа, а таксама медальёна з выявай папы Францішка і подпісам «Перу 2018».
Незвычайная акцыя, якая доўжылася тры месяцы, была ініцыянавана перуанскім ведамствам па выкананні прысудаў. У відэароліку на юцюб-канале ведамства бачна, як дзясяткі жанчын, апранутыя ў адмыслова распрацаваныя да прыезду Пантыфіка майкі з лагатыпам, майструюць ружанцы і запакоўваюць іх.
«Усё Перу ўбачыць, што вы сваімі рукамі змаглі змайстраваць, — адзначае прэс-сакратар архідыяцэзіі Лімы Луіс Гаспар Урыбе. — Вы не павінны саромецца, гэтаксама і Бог не саромеецца вас».
Урад Перу на арганізацыю мерапрыемстваў з нагоды прыезду Папы выдаткаваў 37 мільёнаў перуанскіх соляў (амаль 9 мільёнаў еўра). Асобна стаяць выдаткі Каталіцкага Касцёла ў Перу, неабходныя для забеспячэння святароў літургічным адзеннем і падрыхтоўкі святыняў і іншых структур да прыезду Папы. Продаж ружанцаў дапаможа часткова пакрыць гэтыя выдаткі.
Візіт Папы ў Перу завершыцца 21 студзеня.
