Што рабіць са святыняй, якую перасталі наведваць вернікі? Пра «другое жыццё» каталіцкіх, пратэстанцкіх і англіканскіх святыняў распавядае матэрыял агенцтва «РИА Новости».
«Такога не было нават у СССР»
«Захаду пагражае апакаліптычная рэальнасць», — такую думку выказаў нядаўна Патрыярх Маскоўскі і ўсяе Русі Кірыл кіраўніку Англіканскай Царквы арцыбіскупу Кентэрберыйскаму Джасціну Уэлбі. «Тое, што мы сёння бачым у заходніх краінах, страшней нават за тое, што было з рэлігіяй у СССР.
Адбываецца атэізацыя. Бог выганяецца з чалавечага жыцця. Ігнаруецца Божы закон. Асабліва разбуральна тое, што гэтае ігнараванне набывае форму дзяржаўнага закона.
Калі людзей яго сілай будуць прымушаць здзяйсняць грэх або быць салідарнымі з ім, то мы ўступаем у апакаліптычную рэальнасць», — перакананы прадстаяцель Рускай Праваслаўнай Царквы.
Статыстыка пацвярджае: колькасць парафіянаў Англіканскай Царквы, якая мае статус дзяржаўнай у Вялікабрытаніі, няўхільна зніжаецца: толькі 1,4 працэнты насельніцтва краіны застаюцца ёй вернымі. Сам арцыбіскуп Кентэрберыйскі прызнаецца, што яму прыходзіцца супрацьстаяць «антыхрысціянскай культуры». Асабліва яскрава атэізацыя заўважальная сярод моладзі: сёння трое з чатырох чалавек ва ўзросце ад 18 да 24 гадоў сцвярджаюць, што не вераць у існаванне Бога.
Несуцяшальная статыстыка
Той жа лёс, здаецца, напаткаў на Захадзе і іншыя хрысціянскія канфесіі. А паколькі ўтрыманне культавых будынкаў абыходзіцца дорага, касцёлы і катэдры па ўсёй Еўропе зачыняюцца, іх будынкі арэндуюць ці набываюць пад камерцыйныя праекты.
Згодна з данымі пратэстанцкага выдання Evangelical Focus, Англіканская Царква вымушана кожны год зачыняць каля 20 святыняў. У Даніі амаль 200 цэркваў сёння знаходзяцца ў закінутым стане ці амаль не наведваюцца вернікамі. Свае пазіцыі здае і Каталіцкі Касцёл у Германіі: за апошнія гады зачынена больш за 500 касцёлаў. Але найгорш сітуацыя выглядае ў Нідэрландах, дзе католікі ў найбліжэйшы час рызыкуюць згубіць дзве трэція са сваіх 1600 парафій, а пратэстанты — каля 700 цэркваў.
Бар у алтары
Але вынаходлівыя людзі не даюць апусцелым будынкам прапасці. З Магдэбурга зніклі лютэране? Не бяда. Прадпрымальніца Катрын Рыфенберг выкупіла іх апусцелую святыню і адкрыла ў ёй рэстаран. Аб былым прызначэнні будынка нагадвае толькі яго назва — «Царква».
У алтарнай частцы зараз размяшчаецца барная стойка, а на месцы царкоўных лавак — столікі. Ад убранства святыні засталася толькі пазалочаная статуя анёла.
Каталіцкі скейтборд
Каталіцкі Касцёл у нідэрландскім Арнхеме страціў надзею прыцягнуць парафіянаў і аддаў касцёл св. Юзафа скейтбардыстам. Экстрэмалы з задавальненнем некалькі гадоў каталіся сярод статуй Хрыста і анёлаў. Але ў пачатку кастрычніка 2017 года рампу прыйшлося закрыць, паколькі будынак прыйшоў у аварыйны стан.
Скейбардысты распавядалі, што ў касцёл часам заходзілі пажылыя людзі і абураліся, што ён выкарыстоўваецца не па прызначэнні. Але моладзь парыравала: маўляў, вы ж самі сюды не хадзілі.
«Сардэчна запрашаем» у... цырк
У брытанскім Брыстоле ў запусценне прыйшла катэдра святога Паўла. Будынак нядоўга заставаўся без гаспадара: хутка тут была заснавана школа для артыстаў цырка Circomedia. Зараз артысты атточваюць майстэрства проста пад скляпеннямі катэдры. Паводле сайта Circomedia, часам тут жа ладзяцца прадстаўленні.
«Грэх» замест царквы
Шатландцы пайшлі яшчэ далей. У Эдзінбургу без гаспадара засталася лютэранская царква, дзе ў хуткім часе адкрылі начны клуб і паб. Над назвай прадпрымальнікі, відаць, шмат не думалі і назвалі яе «Sin» («Грэх»). А ў акне над дзвярыма святыні новыя гаспадары размясцілі плакат з Люцыферам...
«Пачынаем прадстаўленне»
У брытанскім Бедфардзе, у апусцелай царкве св. Лукі на вуліцы св. Пятра зараз размяшчаецца тэатр. На сайце тэатра напісана, што будынак царквы ўдалося прыстасаваць пад залу, разлічаную на 282 гледача, студыю на 50 месцаў і прасторны бар.
Кляштар на тры зоркі
У Пітсбургу (ЗША) прыйшоў у запусценне цэлы бэнэдыктынскі кляштар. Зараз у ім размешчаны гатэль Priory. Праўда, шыкоўным сервісам гатэль пакуль пахваліцца не можа — яму прысвоена толькі тры зоркі.
Не страшылкі
«Гэта трагедыя Захаду, якая разварочваецца на нашых вачах. Гэта трагедыя адыходу ад веры, ад каштоўнасцяў, якія сфарміравалі ўсю нашую еўрапейскую ў шырокім сэнсе слова культуру. Мы не можам без болю глядзець на гэта. Мы не можам маўчаць, калі бачым, як частка нашага свету, якая заўсёды была носьбітам хрысціянскага духу і светапогляду, зараз сама адыйшла ад веры ў Бога і штучна прывівае нехарактэрныя сабе каштоўнасці, без якіх абсалютна дакладна можа абысціся», — сцвярджае кіраўнік патрыяршай прэс-службы Рускай Праваслаўнай Царквы іерэй Аляксандр Волкаў.
«Гэта трагедыя не толькі для канкрэтных краін, але і для сучаснага свету ў цэлым. Калі мы не спынімся, то рызыкуем скаціцца ў прорву, з якой не будзе больш вяртання ніколі. Гэта не страшылкі, а зразумелая для любога хрысціяніна рэальнасць», — падкрэслівае святар.
