Амерыканская кампанія Mattel выпусціла новую мадэль сусветна вядомай лялькі Барбі, апранутую ў хіджаб. Пра гэта паведамляе Reuters. На вытворчасць лялькі ў традыцыйным мусульманскім адзенні вытворцу цацак натхніла фехтавальшчыца са Злучаных Штатаў Амерыкі — алімпійская чэмпіёнка Ібціхадж Мухамад.
У 2016 годзе шаблістка заваявала бронзавы медаль у фехтаванні на летніх Алімпійскіх гульнях у Рыа-дэ-Жанейра. Пры гэтым яна стала першай амерыканкай, якая выступіла на гэтых спаборніцтвах у хіджабе.
«Я ганаруся тым, што маленькія дзяўчынкі па ўсім свеце цяпер змогуць гуляць з Барбі, якая вырашыла насіць хіджаб!» — напісала спартсменка ў сваім твітары, адзначыўшы, што ажыццявілася мара яе дзяцінства.
У продаж Барбі ў хіджабе паступіць у продаж восенню 2018 года. Новая Барбі ўвайшла ў серыю лялек Sheroes (female heroes — жанчыны-героі).
Між тым у многіх мусульманскіх краінах Барбі забаронена для продажу.
Пры гэтым там існуюць аналагі Барбі — лялькі Фула, Разана і Джаміля, падобныя да Барбі, але апранутыя ў хіджаб або чадру.
Хіджаб у перакладзе з арабскай мовы — пакрывала. У ісламе хіджабам называюць любое закрытае адзенне (з галавы да ног). У заходнім свеце пад хіджабам разумеюць традыцыйную ісламскую жаночую хустку, якая закрывае валасы на галаве і шыю. Нашэнне жанчынай хіджаба з’яўляецца адным з асноўных правіл ісламскага закона — шарыяту.
Упершыню дзіцячая лялька Барбі была выпушчана ў 1959 годзе ў ЗША.
