Вынікі даследаванняў шатландскай хатняй гаспадаркі паказалі, што праз сем гадоў каталіцкая вера ў Шатландыі ізноў стане самай распаўсюджанай рэлігіяй.
Як паведамляе World Religion News, у апытанні прынялі ўдзел больш за 10 тысяч чалавек. Каля 51 працэнта з апытаных заявілі, што не прытрымліваюцца ніякай рэлігіі, 24 працэнты жыхароў каралеўства ў складзе Вялікабрытаніі прытрымліваюцца нацыянальнай Прэзбітэрыянскай Царквы Шатландыі, а 14 працэнтаў ідэнтыфікуюць сябе як католікі. Прычым колькасць паслядоўнікаў Каталіцкага Касцёла працягвае імкліва павялічвацца.
У многім такую тэндэнцыю забяспечваюць эмігранты з каталіцкай Ірландыі. Разам з тым, колькасць парафіянаў шатландскай Царквы з кожным годам няўхільна зніжаецца.
Даследаванне паказала, што, калі гэтыя тэндэнцыі працягнуцца, то праз сем гадоў Шатландыя ізноў стане каталіцкай краінай — упершыню пасля Рэфармацыі.
