У прадстаўленым у шатландскі парламент законапраекце аб злачынствах на глебе нянавісці і ў грамадскім парадку ўсялякая крытыка гендарнай ідэалогіі прызнаецца злачынствам.
Кіраўнікі хрысціянскіх супольнасцяў, як паведамляе інфармацыйнае агенцтва КАІ, заклікалі аўтараў новага закону да выдалення спрэчнага фрагменту. На іх думку, закон у такой рэдакцыі пагражае свабодзе слова і сумлення.
У лісце, скіраваным да міністра юстыцыі, кіраўнікі Касцёлаў заклікаюць з большай увагай абараняць грамадзянскія правы.
«Людзі павінны мець поўную свабоду думкі, у тым ліку пры выказванні крытычных заўваг да Касцёлаў і веры», — чытаем у звароце.
Кіраўнікі хрысціянскіх супольнасцяў падкрэсліваюць, што гендарнае пытанне сёння стала прадметам шырокага і эмацыйнага публічнага абмеркавання, што неабходна, калі грамадства сутыкаецца з новымі ідэямі.
«Мы перакананы, што крытычнае меркаванне, а значыць нязгоднае з тэзісам, што пол — неакрэслены і зменны, таксама павінна быць прынята да ўвагі», — напісалі біскупы і духавенства Евангельскай Царквы.
На думку падпісантаў, чатыры тыдні на зацвярджэнне законапраекту — занадта кароткі перыяд, каб парламент меў час на дастатковае асэнсаванне наступстваў увядзення новага закону.
