543 чалавекі залічаны на першы курс духоўных семінарый у Польшчы. Яшчэ 222 кандыдаты выказалі намер гэтай восенню падацца ў семінарыі мужчынскіх ордэнаў.
Пра гэта паведамляе Канферэнцыя Каталіцкіх Біскупаў у Польшчы.
Агулам у Польшчы да прэзбітэрскага пасвячэння рыхтуецца 3 тысячы семінарыстаў. На сёння Польшча — краіна-лідар у Еўропе па колькасці пакліканняў да святарства і манаства. Рэкордным годам быў 2005, калі колькасць залічаных у семінарыі на першы курс дасягала 1 145 чалавек.
У той жа час у Ірландыі колькасць пакліканняў да святарства знізілася да рэкордных лічбаў. Як паведамляе Irish Times, толькі шэсць юнакоў распачнуць падрыхтоўку да святарства ў каледжы Св. Патрыка ў Мейнуце. Гэта найніжэйшы паказчык з моманту заснавання каледжа ў 1775 годзе.
У Беларусі ў гэтым годзе ў дыяцэзіяльныя семінарыі залічаны 11 юнакоў: восем — у семінарыю ў Пінску і трое — у семінарыю ў Гродна.
