![](/3/images/news/2017/09/2017-09-05-okonar.jpg)
Кардынал Кормак Мэрфі О'Конар, былы прымас Англіі і Уэльса, памёр 1 верасня ва ўзросце 85 гадоў з прычыны анкалагічнай хваробы.
Стан здароўя арцыбіскупа Вестмінстэрскага рэзка пагоршыўся ў пачатку жніўня. Іерарх быў шпіталізаваны, а каталіцкія біскупы Брытаніі заклікалі вернікаў да малітвы.
Кормак Мэрфі О'Конар нарадзіўся 24 жніўня 1932 года ў англійскім Рэдынгу ў сям’і ўрача-ірландца і быў адным з шасці дзяцей. Трое яго братоў сталі святарамі. Прэзбітэрскае пасвячэнне Кормак Мэрфі О'Конар атрымаў у 1956 г. У 1977 годзе быў прызначаны біскупам Арундэла і Брайтана. У 2000 стаў арцыбіскупам Вестмінстэрскім.
За некалькі гадзін да смерці паміраючы іерарх звярнуўся да свайго пераемніка на Вестмінстэрскай кафедры кардынала Вінсэнта Нікалса. «Я прабываю ў спакоі і не баюся таго, што настане, — сказаў кардынал О’Конар. — За сваё жыццё я атрымаў мноства благаслаўленняў — асабліва праз маіх родных і сяброў».
Пасля смерці Кормака Мэрфі О'Конара ў Калегіі засталося 222 кардыналы. З іх права голасу на канклаве мае 121 іерарх.