У суботу 12 кастрычніка беларусы-католікі Уроцлава (Польшча) ўзялі ўдзел ў 45-й пешай пілігрымцы да месца пахавання святой Ядзвігі Сілезскай у Трэбніцы.
Як паведамляецца на сайце Душпастырства беларусаў у Польшчы Сatholicby.pl, дэвізам паломніцтва, да якога далучыліся нашы суайчыннікі, сталі словы «Мы — Касцёл».
На заканчэнне пілігрымкі адбылася ўрачыстая святая Імша, цэлебрацыю якой узначаліў арцыбіскуп Гданьскі Тадэвуш Войда SAC, Старшыня Канферэнцыі Епіскапату Польшчы. Эўхарыстыю канцэлебравалі біскупы Уроцлаўскай архідыяцэзіі і вялікая колькасць святароў.
Агульная колькасць пілігрымаў, якія ў гэты дзень прыбылі да рэліквій святой Ядзвігі з розных куткоў Ніжняй Сілезіі, склала каля 9 тыс. чалавек.
Пілігрымы з Уроцлава пешкі пераадолелі шлях амаль у 30 кіламетраў, несучы свае інтэнцыі да святой Ядзвігі. Санктуарый святой Ядзвігі Сілезскай у Трэбніцы, дзе спачываюць яе рэліквіі, — гэта асаблівае месца культу апякункі Уроцлаўскай архідыяцэзіі і ўсёй Сілезіі.
Ядзвіга нарадзілася каля 1174 года ў Баварыі (Германія), выхоўвалася ў кляштары бэнэдыктынак і ва ўзросце 12-і гадоў выйшла замуж за Генрыха І, караля Сілезіі.
Разам з мужам яна пашырала хрысціянства на іх землях, фундавала шпіталі і кляштары.
Яна мужна перанесла смерць сваіх семярых дзяцей, а пасля смерці мужа апошнія гады свайго жыцця правяла ў кляштары цыстэрцыянак, які сама заснавала.
