12 мая, у Сёмую Велікодную нядзелю, беларусы Масквы і Маскоўскай вобласці Расіі сустрэліся ў капліцы кляштара айцоў францішканаў на супольнай малітве і святой Імшы, якую цэлебраваў айцец Пётр Карнелюк OFMConv.
Перад набажэнствам адбылася адарацыя Найсвяцейшага Сакрамэнту і Ларэтанская літанія да Найсвяцейшай Панны Марыі.
«Езус выбраў нас з гэтага свету. Мы належым Богу, Ён любіць нас, даруе нам грахі і працягвае сваю руку. Робіць нас часткай сябе, свайго Боскага жыцця. Менавіта Езус сабраў народ Божы, стаў ахвярай на Крыжы праз балючую ганебную смерць, каб кожны вернік меў жыццё вечнае», — адзначыў у прамоўленай гаміліі душпастыр беларусаў каталіцкага веравызнання сталічнага рэгіёну суседняй краіны.
Францішканін дадаў, што Бог жадае для ўсіх вернікаў паўнаты радасці, якую можа даць толькі Ён: радасці і любові да Яго і да бліжняга.
«Не толькі да нашых блізкіх, але і да выпадковых мінакоў на вуліцы, якія ідуць насустрач; да таго небаракі з суседняга пад’езда, які ўвесь час наракае і скардзіцца на жыццё кожны раз, калі кагосьці сустракае», — заўважыў святар.
Ён патлумачыў сабраным у капліцы суайчыннікам, што Езус пакідае нас у гэтым свеце таксама, як некалі пакінуў сваіх Апосталаў. «Ён не абяцаў ім ніякіх прывілеяў ці выгодаў: наадварот, папярэджваў пра нянавісць і пераслед у гэтым свеце. Так і нас Ён пакідае ў цяжкасцях і турботах гэтага свету з надзеяй на жыццё вечнае і радасць сусрэчы з Богам пасля заканчэння нашага зямнога шляху.
Падобна да Марыі і апосталаў, мы рыхтуемся прыняць дар Духа Святога з той любоўю, якая адкрывае нашыя сэрцы для Бога, адзінага ў Тройцы, робіць нас удзельнікамі гэтата цуду і сведкамі Ягонай Праўды», — сказаў на заканчэнне сваёй палымянай гаміліі айцец Пётр.
Пасля малітвы ўдзельнікі набажэнства абмеркавалі ў культурным цэнтры францішканскага кляштару ўдзел у пілігрымках, якія будуць ладзіцца да святыняў Беларусі ў летні час.
Гэта стане добрай нагодай для таго, каб паглыбіць сваю веру і ўмацавацца на шляху хрысціянскага жыцця.
